Исус им ги мие стапалата на Своите ученици

13 Беше ден пред празникот Пасха. Исус знаеше дека дојде времето да замине од овој свет и да се врати кај Таткото. Тој отсекогаш ги сакаше Своите следбеници кои беа во светот, и остана да ги сака докрај^[a].

² За време на вечерата (а Ѓаволот веќе го беше поттикнал срцето на Јуда Искариот, син на Симон, да Го предаде), ³ Исус, знаејќи дека Таткото Му предал се во Негови раце и дека од Бог излегол и кај Бог се враќа, ⁴ стана од вечерата, ја соблече наметката и се препаша со крпа. ⁵ Потоа Тој налеа вода во леген и започна да им ги мие стапалата на учениците и да им ги брише со крпата со која беше препашан.

⁶ Кога стигна до Симон Петар, овој Му рече: „Господе, зар Ти да ми ги миеш стапалата!?“ ⁷ Исус му одговори: „Ти сега не го разбираш ова што Јас го правам, но подоцна ќе сфатиш.“ ⁸ „Не!“ - му рече Петар - „Ти никогаш нема да ми ги миеш стапалата!“ „Ако не те измијам“ - му одговори Исус - „нема да имаш дел со Мене!“

⁹ „Господе“, - му рече Симон Петар - „тогаш измиј ми ги не само стапалата, туку и рацете и главата!“

¹⁰ Исус му рече: „На искапаниот треба само стапалата да му се измијат, затоа што целиот е чист^[b]. Вие сте чисти, но не сите. ¹¹ Исус знаеше кој ќе Го предаде и затоа рече: „Сите не сте чисти“.

¹² Откако им ги изми стапалата и ја облече наметката, Исус повторно седна и им рече: „Сфаќате ли што направив за вас? ¹³ Ме нарекувате Учител и Господ, и со право така велите, зашто Јас навистина сум тоа. ¹⁴ Кога Јас, вашиот Господ и Учител, ви ги измив стапалата, тогаш и вие треба да си ги миете стапалата еден на друг. ¹⁵ Јас ви дадов пример за да постапувате и вие како што Јас постапив со вас. ¹⁶ Ве уверувам дека слугата не е поголем од господарот, ниту пратеникот од оној што го испратил. ¹⁷ Штом ги знаете овие работи, благословени ќе бидете ако ги извршувате.

¹⁸ Не ви се обраќам на сите. Јас ги знам оние што сум ги избрал. Но она што го вели Светото Писмо мора де се исполни. А тоа вели: ,Оној што заедно со мене јадеше, ја крена својата петица против мене^[c]‘.

¹⁹ Ви ги кажувам овие работи уште пред да се случат, па кога ќе се исполнат, да поверувате дека Јас Сум^[d] Тој што Сум. ²⁰ Ве уверувам дека секој што го прима оној што Јас го испраќам - Мене Ме прима; а Кој Ме прима Мене - Го прима Оној што Ме испрати.“

Исус претскажува дека ќе биде предаден

(Матеј 26:20-25; Марко 14:17-21; Лука 22:21-23) ²¹ Откако го рече ова, Исус длабоко се натажи и рече: „Ова што ќе ви го кажам е вистина: еден од вас ќе Ме предаде!“

²² Учениците започнаа да се загледуваат еден во друг, прашувајќи се за кого зборува. ²³ Еден од Неговите ученици беше навален^[e] на Исусовите гради. Тој му беше најомилениот ученик на Исус. ²⁴ Нему Симон Петар му даде знак да праша на кого се однесува реченото?

²⁵ Тој повторно се навали на Исусовите гради и Го праша: „Господе, за кого зборуваш?“

²⁶ Исус му одговори: „Тоа е оној на кого ќе му го дадам залакот што ќе го макнам.“ Потоа го макна залакот и му го даде на Јуда Искариот, син на Симон. ²⁷ Веднаш по залакот, Сатаната влезе во Јуда. Исус, пак, му рече: „Направи го брзо тоа што си наумил да го направиш!“

²⁸ Но никој од присутните не разбра зошто Исус му рече така. ²⁹ Јуда беше задолжен за ќесето со пари, па некои помислија дека Исус му порачува да купи се што е потребно за празникот, или да им даде нешто на сиромасите. ³⁰ Кога Јуда го прими залачето леб веднаш излезе. А беше ноќ.

Нова заповед

³¹ Кога Јуда излезе, Исус рече: „Сега Синот Човечки ќе биде прославен и Тој ќе Му донесе слава на Бог. ³² Штом Тој ќе Му донесе слава на Бог, тогаш и Бог ќе Го прослави Него и тоа ќе биде наскоро!

³³ Чеда Мои, уште малку сум со вас. Потоа ќе Ме барате, но како што им кажав на еврејските старешини, така и вам сега ви кажувам: вие не можете да дојдете таму каде што Јас заминувам.

³⁴ Нова заповед ви давам: „Сакајте се еден со друг! Како што Јас ве засакав, така и вие да се сакате еден со друг. ³⁵ Ако се сакате еден со друг, луѓето ќе знаат дека сте Мои ученици.“

Исус го претскажува откажувањето на Петар

(Матеј 26:31-35; Марко 14:27-31; Лука 22:31-34) ³⁶ Симон Петар Му рече: „Господе, каде заминуваш?“

Исус му одговори: „Ти сега не можеш да дојдеш таму каде што Јас заминувам, но ќе Ми се придружиш подоцна.“

³⁷ Петар Му рече: „Господе, зошто не можам да Ти се придружам сега? Јас сум готов и својот живот да го положам за Тебе!“

³⁸ „Твојот живот ли ќе го положиш за Мене?“ - му возврати Исус. „Те уверувам, дека, уште пред да запее петел - ти трипати ќе порекнеш дека воопшто Ме познаваш!“