Јован 12

Macedonian New Testament

Помазанието на Исус

(Мaтej 26:6-13; Марко 14:3-9) 12 Шест дена пред празникот Пасха, Исус се врати во Бетанија. Тоа беше местото каде што живееше Лазар, кого Исус го оживе од мртвите. ² Таму Му беше приредена вечера на Исус. Марта послужуваше, а Лазар беше еден од оние што седеа на трпезата заедно со Исус. ³ Тогаш Марија зеде половина литар^[a] чист и скапоцен нардов парфем, Му ги полеа стапалата на Исус и Му ги избриша со својата коса. По куќата се рашири пријатниот мирис на парфемот.

⁴ Еден од Исусовите ученици, Јуда Искариот, (кој подоцна Го предаде) рече:

⁵ „Овој парфем можеше да се продаде за триста денарии^[b], а парите да им се разделат на сиромасите!“ ⁶ Ова не го рече од грижа за сиромасите, туку затоа што беше крадец. Имено, тој беше благајник и си земаше од парите што беа кај него.

⁷ „Оставете ја!“ - одговори Исус на тоа. „Парфемот бил чуван за да послужи за Мојот погреб. ⁸ Сиромаси секогаш ќе има меѓу вас, а Мене Ме немате секогаш.“

Завера и против Лазар

⁹ Во меѓувреме голем број Евреи дознаа дека Исус е таму, па дојдоа, не само заради Него, туку и да го видат Лазара, кого Тој го оживе од мртвите. ¹⁰ Тогаш свештеничките поглавари решија да го убијат и Лазара, ¹¹ бидејќи заради него голем број Евреи ги напуштаа свештениците и почнуваа да веруваат во Исус.

Свеченото влегување во Ерусалим (Цветници)

(Матеј 21:1-11; Марко 11:1-11; Лука 19:28-40) ¹² Следниот ден многубројниот народ што беше дошол на празникот разбра дека Исус доаѓа во Ерусалим. ¹³ Луѓето зедоа палмови гранчиња, па излегоа да Го пречекаат, извикувајќи: „Спаси не сега^[c]! Благословен е Тој што доаѓа во името на Господ! Благословен да е Царот^[d] на Израел!“

¹⁴ Исус најде едно младо магаре и се качи на него, токму како што беше претскажано во Светото Писмо:

¹⁵ „Не плаши се, ерусалимски^[e] народе! Погледни! Царот твој доаѓа, јавајќи на младо магаре^[f]!“

¹⁶ Во почетокот Неговите ученици не сфатија дека ова беше исполнување на пророштвото, но кога Исус се прослави^[g], тогаш си спомнаа дека ова беше претскажано за Него и дека тие беа учесници и очевидци.

¹⁷ А народот што беше со Исус кога Тој го повика Лазара од гробот и го оживе од мртвите продолжуваше да раскажува насекаде за таа случка. ¹⁸ Како резултат на тоа, многуброен народ излезе да Го пречека, откако слушна дека Тој го направил ова чудо. ¹⁹ Тогаш фарисеите си рекоа: „Гледате дека се е залудно! Целиот народ тргна по Исус!“

²⁰ А меѓу оние што дојдоа на поклонение за време на празникот имаше и некои Грци. ²¹ Тие му пристапија на Филип, кој беше од Бетцаида во Галилеја, и му рекоа: „Господине, сакаме да се сретнеме со Исус!“ ²² Филип отиде и му кажа на Андреј. Потоа, Андреј и Филип отидоа заедно и Му кажаа на Исус.

²³ Тогаш Исус им одговори: „Дојде време Синот Човечки да влезе во Својата слава.

²⁴ Ве уверувам дека, доколку пченичното зрно не падне во земјата и не умре, тоа ќе остане само едно зрно. Ако, пак, умре, тоа ќе произведе многу нови зрна. ²⁵ Човек што себично сака да си го задржи животот, ќе го загуби, а оној што мрази^[h] да го живее својот живот само на овој свет, ќе добие вечен живот. ²⁶ Кој сака да Ми служи, тој мора да Ми се придружи, зашто и Мојот слуга треба да биде таму каде што сум Јас. А секој што Мене Ми служи, ќе биде почитуван од Мојот небесен Татко.“

Исус ја навестува Својата смрт

²⁷ „Сега душата Ми е длабоко потресена, но што да кажам? Зар да се молам: ,Татко, поштеди Ме од ова што Ме очекува?‘ Па токму за таа цел^[i] дојдов на овој свет! ²⁸ Татко, прослави го Своето име!“ Тогаш се чу глас од небото: „Веќе Го прославив и одново ќе го прославам!“ ²⁹ Многубројниот народ што стоеше и го слушна гласот, велеше: „Загрме!“ Други велеа: „Ангел Му проговори!“

³⁰ Исус им одговори: „Овој глас не се јави заради Мене, туку заради вас. ³¹ Сега е време за суд над овој свет. Владетелот^[j] на овој свет сега ќе биде соборен. ³² А кога Јас ќе бидам подигнат над земјата - ќе ги привлечам сите кон Себе.“ ³³ Исус го рече ова за да објави со каква смрт ќе умре.

³⁴ Народот, пак, Му возврати: „Ние сме слушнале од Светото Писмо^[k] дека Месијата ќе остане вечно. Зошто Ти велиш дека Синот Човечки треба да умре и да биде подигнат над земјата? Кој е Тој Син Човечки?“

³⁵ „Светлината ќе биде меѓу вас уште малку време“ - им рече Исус. „Дојдете кај Светлината^[l], додека ја имате, за да не ве зафати слепо талкање во темнина. ³⁶ Верувајте во Светлината, додека ја имате меѓу вас, за да станете деца на Светлината.“ Исус го изговори ова, па си замина и се скри од нив.

Неверството на еврејскиот народ

³⁷ Иако Исус направи толку големи чуда пред Евреите, најголемиот дел од нив, сепак не поверуваа во Него, ³⁸ за да се исполни пророштвото изречено од пророкот Исаија: „Господе, кој и поверува на нашата порака? На кого да му се објави спасоносната сила Господова^[m]?“

³⁹ Тие не можеа да поверуваат, зашто Исаија го рекол и следното^[n]:

40„Бог им ги ослепе очите и

им го закорави умот на овие луѓе,

за да не гледаат со очите,

и да не разберат со умот,

та да се обратат и Јас да ги излекувам.“

⁴¹ Исаија го кажа ова затоа што ја виде Христовата слава и зборуваше за Него.

⁴² Па, иако многумина од старешините поверуваа во Исус, сепак, поради фарисеите криеја, за да не бидат исклучени од синагогата^[o]. ⁴³ Тие повеќе сакаа да добијат пофалба од луѓето, отколку од Бог.

Зборовите на Исус ќе им судат

⁴⁴ Тогаш Исус гласно извика: „Секој што верува во Мене, истовремено верува и во Оној што Ме испрати! ⁴⁵ Секој што Ме гледа Мене, Го гледа Оној што Ме испрати^[p]. ⁴⁶ Јас дојдов за да бидам светлина на овој свет. Кој верува во Мене, нема да живее во мрак.

⁴⁷ Јас нема да им судам на оние што ги слушаат Моите зборови, а не ги исполнуваат^[q], зашто Јас дојдов да го спасам светот, а не да му судам. ⁴⁸ За оние што Ме отфрлаат и не ги примаат Моите зборови постои Судија: учењето што го објавив ќе им суди на Судниот Ден^[r]. ⁴⁹ Јас не зборувам од самоволие, туку го кажувам и го објавувам она што ми го кажа Таткото Кој Ме испрати. ⁵⁰ Јас знам дека Неговите заповеди носат вечен живот^[s]. Значи, сето ова што го зборувам Јас е она што Таткото Ми заповеда да го кажам.“