Марко 3

Macedonian New Testament

Исус исцелува во саботен ден

Заговор против Исус

(Мт. 12:9-14; Лк. 6:6-11) 3 Исус повторно влезе во тамошната синагога и таму сретна еден човек со парализирана рака. ² Фарисеите сакаа да Го обвинат Исуса, па Го демнеа, за да видат дали ќе го исцели човекот во саботен ден.

³ Исус му се обрати на човекот со парализирана рака: „Дојди, застани пред сите!“ ⁴ Потоа праша: „Што треба да се прави во сабота: добро или лошо? Да се спаси некој човечки живот, или да се уништи?“ Сите молчеа. ⁵ Исус налутено ги изгледа сите по ред. Сепак, Му стана жал за нив, поради нивната тврдоглавост. Потоа му се обрати на човекот: „Испружи си ја раката!“ Тој ја испружи и раката му оздраве.

⁶ Фарисеите веднаш излегоа и заедно со приврзаниците на Ирод се договорија да Го убијат Исуса.

Масовно доаѓање кај Исус

⁷ Исус се повлече со Своите ученици по должината на езерското крајбрежје. По Него одеше голема толпа народ од Галилеја, ⁸ како и од Јудеја, од Ерусалим, од Идумеја и од други места на источната страна од реката Јордан. Доаѓаа и луѓе од поширокото подрачје на градовите Тир и Сидон. Сите тие дојдоа, откако беа слушнале за делата на Исус. ⁹ Тој беше принуден да им каже на Своите ученици во секое време да имаат подготвено бротче за Него, за да не Го згмечи народот.

¹⁰ Бидејќи исцелуваше мнозина, сите болни навалуваа кон Него, за да Го допрат. ¹¹ А демонските духови паѓаа ничкум пред Исус и викаа: „Ти Си Божјиот Син!“ - ¹² иако Тој строго им забрануваше да кажуваат кој е Тој.

Изборот на дванаесетте апостоли

(Мт. 10:1-4; Лк. 6:12-16) ¹³ Потоа Исус се упати кон гората, повикувајќи ги со Себе и оние што ги беше избрал. Тие Му се придружија. ¹⁴ Од нив Тој избра дванаесет души да бидат Негови апостоли: да Го придружуваат и да ги испраќа да проповедаат. ¹⁵ Исто така и да ги ослободуваат луѓето обземени од демони. ¹⁶ А дванаесеттемина беа овие: Симон, кого Исус го нарече Петар, ¹⁷ Завдаевите синови Јаков и Јован, кои Исус ги нарече „грмежливи синови^[a]“, ¹⁸ Андреј, Филип, Бартоломеј, Матеј, Тома, Алфеевиот син Јаков, потоа Тадија, Симон Кананеецот^[b], ¹⁹ и Јуда Искариот, кој подоцна стана предавник на Исус.

Исус е наречен Кнез на демоните

(Мт. 12:22-32; Лк. 11:14-23; 12:10) ²⁰ Исус се врати дома, а голема толпа народ повторно навали, така што Тој и Неговите ученици не можеа ни да јадат. ²¹ Кога Неговите домашни разбраа за ова, тргнаа да Го приберат, зашто се говореше дека Тој е луд.

²² Вероучителите што беа дојдени од Ерусалим зборуваа дека Исус е обземен од Баалзибул^[c] - поглавицата на демонските духови - и дека со помош на Баалзибул ги изгонува демонските духови.

²³ Тогаш Исус го повика народот да се собере околу Него, па почна да му зборува преку споредби.

„Како може Сатаната сам себеси да се изгонува!? ²⁴ Царство во кое едни против други војуваат, не може да се одржи! ²⁵ Семејство во кое владее неслога, не може да се одржи! ²⁶ Ако Сатаната се крене сам против себе - тоа би значело крај за него!

²⁷ Може ли некој да му упадне во куќата на силен човек и да го ограби, ако прво не го совлада и не го врзе? Само така ќе може да го ограби!

²⁸ Сериозно ви велам: сите грешни дела и навреди^[d], колку и да се тешки, можат да им бидат простени на луѓето; ²⁹ но нема простување за оној што ќе го навреди Светиот Дух; таквиот грев вечно ќе го товари.“ ³⁰ Исус го рече ова, зашто за Него говореа дека е обземен со демонски дух.

Кое Му е вистинското семејство на Исус?

(Мт. 12:46-50; Лк. 8:19-21) ³¹ Тогаш пристигнаа мајка Му и браќата на Исус. Стоејќи надвор, тие испратија некого да Го повика. ³² Токму тогаш околу Него се беше насобрал многу народ и некои меѓу нив Му рекоа: „Ене ги надвор мајка ти, браќата и сестрите Твои и Те викаат!“

³³ А Тој им одговори: „Која ми е мајка и кои ми се браќа и сестри?“ ³⁴ Покажувајќи на седнатите околу Него, додаде: „Еве ги мајка Ми и браќата Мои! ³⁵ Секој што ја извршува Божјата волја ми е и брат и сестра и мајка!“