СЕДУМ СПОРЕДБИ ЗА НЕБЕСНОТО ЦАРСТВО

13 Истиот ден Исус излезе од куќата и седна на брегот на езерото. ² Околу Него се насобра голема толпа народ и Тој се искачи и седна на едно бротче, а народот остана да стои на брегот. ³ И му говореше за многу нешта, користејќи се со споредби.

1. Споредба со сејачот, семето и почвата

⁴ „Еден сејач излезе да сее на својата нива.

Сеејќи така, дел од семето падна на тврда почва, покрај патот; долетаа птици и го исколваа.

⁵ Друг дел од семето падна на каменеста почва, каде што имаше малку земја, и тоа брзо никна бидејќи земјата беше плитка. ⁶ Но штом запече сонцето, стебленцето свена и се исуши, бидејќи немаше доволно длабоки корени за да го одржат во живот.

⁷ Трет дел од семето падна меѓу трње. Кога пораснаа трњето - го задушија стебленцето.

⁸ Конечно, дел од семето падна на плодна почва и донесе плод: едно стебло роди сто, друго шеесет, а трето триесет зрна. ⁹ Ако имате уши, слушајте внимателно!“ - заклучи Исус.

Зошто преку споредби?

(Мк. 4:10-12; Лк. 8:9-10) ¹⁰ Тогаш на Исус Му пристапија Неговите ученици и Го запрашаа: „Зошто му зборуваш на народот преку споредби?“ ¹¹ А Тој им одговори: „Вам ви е дадено да ги запознавате тајните на небесното царство, но ним не им е. ¹² Зашто, на оној што е отворен за она што Јас го поучувам, ќе му биде дадено уште подлабоко разбирање; а на оној што не сака да Ме слуша, ќе му се земе и она што го има. ¹³ Им зборувам преку споредби бидејќи тие, имајќи очи, не гледаат, и имајќи уши - не слушаат, ниту пак се трудат да разберат. ¹⁴ Кај нив се исполнува претскажаното од Бог преку пророкот Исаија, кој вели:

,Ќе го слушате Моето Слово, но нема да го разберете;

ќе ги гледате Моите дела, но нема да ги сфатите.

¹⁵ Зашто, срцата на овие луѓе им се закоравени!

Со ушите одвај слушаат, а очите си ги затвораат.

Не сакаат да видат,

да слушнат и да разберат, па да се свртат кон Мене за да ги исцелам^[a].‘

¹⁶ А блазе си ви вам, зашто вие гледате и слушате! ¹⁷ Ви велам дека многу пророци и многу праведници имаа желба да го видат тоа што вие го гледате, но не го видоа, и да го чујат тоа што вие го слушате, но не го слушнаа.“

Исус објаснува: срцата се како почва

(Мк. 4:13-20; Лк. 8:11-15) ¹⁸ „Чујте го сега значењето на споредбата со сејачот.

¹⁹ Тврдата почва покрај патот ги претставува оние луѓе што ја слушаат пораката за небесното царство, но не се трудат да ја разберат. Ѓаволот^[b] доаѓа и го отстранува посеаното кај нив.

²⁰ Каменестата почва ги претставува оние луѓе што ја слушаат Божјата порака и со задоволство ја примаат; ²¹ меѓутоа, бидејќи таа во нив не се закоренува, тие остануваат верници само за кратко: штом надојдат неволи или прогонства поради верата во Божјата порака, тие веднаш се откажуваат.

²² Трнливата почва ги претставува оние луѓе што ја слушаат Божјата порака, но прекумерната грижа за овој живот, како и занесот по збогатување ја задушуваат пораката во нив и тие остануваат бесплодни.

²³ Плодната почва ги претставува оние луѓе што ја слушаат Божјата порака и се трудат да ја разберат. Тоа семе ќе донесе плод: некаде по сто, некаде по шеесет, а некаде по триесет зрна.“

2. Споредба со каколот

²⁴ Потоа Исус им кажа уште една споредба: „Небесното царство може да се спореди со човек што посеал чисто пченично семе во својата нива. ²⁵ Но, додека луѓето спиеле, дошол неговиот непријател, посеал какол меѓу пченицата и си заминал. ²⁶ Кога посеаното порасна и заврза плод, се покажа и каколот. ²⁷ Дојдоа слугите кај домаќинот и му рекоа: ,Господару, зар ти не беше посеал чисто семе на твојата нива? Од каде сега се појави овој какол?‘ ²⁸ А тој им одговори: ,Тоа ми го направи непријателот!‘ Тогаш слугите му рекоа: ,Сакаш ли да појдеме и да го искорнеме каколот?‘ ²⁹ ,Немојте‘ - им одговори тој - ,зашто, корнејќи го каколот, со него ќе го искорнете и житото.‘ ³⁰ Оставете ги, нека растат заедно до жетвата. Тогаш ќе им наредам на жетварите: ,Издвојте го најнапред каколот, врзете го во снопови и изгорете го, а житото соберете го во Моите складови!‘“

3. Споредба со синаповото зрно

(Мк. 4:30-32; Лк. 13:18-19) ³¹ Потоа, Исус им кажа уште една споредба: „Небесното царство може да се спореди со синапово зрно што некој ќе го посее во својата нива. ³² Иако тоа е најмало од сите семиња, кога ќе порасне, ги надвишува сите градинарски растенија и станува дрво на кое и птиците слетуваат и си свиваат гнезда на неговите гранки.“

4. Споредба со квасецот

(Лк. 13:20-21) ³³ Исус им кажа и ваква споредба: „Небесното царство може да се спореди со квасец што жената го замесува со три мери брашно, по што целото тесто нараснува!“

За проповедањето преку споредби

(Мк. 4:33-34) ³⁴ Исус се користеше со споредби за да му го објасни на народот сето ова и ништо не им говореше без споредби. ³⁵ Со тоа се исполнуваа Божјите зборови претскажани преку пророкот:

„Ќе им говорам преку споредби,

ќе им ги објавам тајните што беа скриени

од создавањето на светот^[c].“

Исус ја објаснува споредбата со каколот

³⁶ Тогаш Исус го пушти народот да се разотиде, а Тој се врати дома. Таму Му пристапија Неговите ученици и Му рекоа: „Објасни ни ја споредбата за каколот на нивата.“ ³⁷ Исус им одговори: „Човекот што сее чисто семе сум Јас, Синот Човечки. ³⁸ Нивата го претставува светот. Чистото семе ги претставува следбениците^[d] на Божјото царство. Каколот ги претставува следбениците на Ѓаволот^[e]. ³⁹ Непријателот што го сее каколот е Ѓаволот. Жетвата е крајот на светот, а жетвари се ангелите. ⁴⁰ Како што каколот се собира и се фрла в оган, така ќе биде и на крајот на светот. ⁴¹ Јас, Синот Човечки, ќе ги испратам Своите ангели да ги соберат сите оние кои поттикнуваат на грев и сите злосторници; ⁴² тие ќе ги фрлат во огнена печка, каде што ќе има пискоти и крцкање со заби. ⁴³ Тогаш праведниците ќе заблескаат како сонца во царството на Својот небесен Татко. Кој има уши, нека слуша!“

5. Споредба со скриеното богатство

⁴⁴ „Небесното царство може да се спореди со богатство скриено во нива. Човекот што ќе го пронајде повторно го закопува и сиот радосен оди и продава се што поседува и ја купува таа нива.“

6. Споредба со бисерот

⁴⁵ „Понатаму, небесното царство може да се спореди со трговец што трага по најскапоцениот бисер; ⁴⁶ кога ќе го најде, тој оди и продава се што има и го купува.“

7. Споредба со рибарската мрежа

⁴⁷ „Понатаму, небесното царство може да се спореди со голема рибарска мрежа што се фрла в море, при што зафаќа секаков вид риби. ⁴⁸ Кога мрежата ќе се наполни, ја извлекуваат на брегот, седнуваат, и добрите риби ги издвојуваат во кошеви, а лошите ги фрлаат. ⁴⁹ Така ќе биде и на крајот на светот: ќе излезат ангелите, ќе ги издвојат грешниците од праведниците, ⁵⁰ и ќе ги фрлат во огнена печка, каде што ќе има пискоти и крцкање со заби.“

Спрега меѓу Стариот и Новиот завет

⁵¹ „Го разбравте ли сето ова?“ - ги запраша Исус. „Да!“ - Му одговорија тие. ⁵² А Тој им рече: „Тогаш, секој вероучител којшто станал ученик на небесното царство може да се спореди со домаќин кој од своите ризници ќе може да извади и ново^[f] и старо.“

Исус се враќа во Назарет, но не е прифатен

(Мк. 6:1-6; Лк. 4:16-30) ⁵³ Штом Исус заврши со изложувањето на споредбите, си замина оттаму, ⁵⁴ и се врати во Назарет - своето поранешно живеалиште, каде што го поучуваше народот по синагогите^[g]. Сите што Го слушаа се чудеа и говореа: „Каде се стекнал овој човек со олкава мудрост и моќ да прави чуда? ⁵⁵ Зар Тој не е синот на дрводелецот? Нели му е мајка Марија и нели му се браќа Јаков, Јосиф, Симон и Јуда? ⁵⁶ Нели се меѓу нас и сите Негови сестри? Каде ли се здобил овој човек со сето ова?“ ⁵⁷ Жителите на Назарет Го пречекаа со сомневања. Тогаш Исус им рече: „Пророкот останува без признание единствено во својот град и во своето семејство.“ ⁵⁸ И бидејќи Го дочекаа со недоверба, Тој не направи таму многу чуда.