⁷ “अय्यूब क नाई कउनो भी मनई नाहीं अहइ जेकर मुँह परमेस्सर क निन्दा स भरा रहत ह।
    अय्यूब बरे परमेस्सर क बेज्जती करइ मँ आसानी स पानी क पीवइ जइसा अहइ।
⁸ अय्यूब बुरे लोगन क साथी अबइ
    अउर अय्यूब क बुरे लोगन क संगत भावत ह।
⁹ काहेकि अय्यूब कहत ह,
    ‘अगर कउनो मनई परमेस्सर क हुकुम मानई क जतन करत ह तउ एहसे उ मनई क कछू भी भला न होइ।’

¹⁰ “अरे ओ लोगो जउन समुझ सकत हवा, तउ मोर बात सुना,
    परमेस्सर कबहुँ भी बुरा नाहीं करत ह।
    सर्वसक्तीमान परमेस्सर कबहुँ भी बुरा नाहीं करी।
¹¹ परमेस्सर मनई क ओकर कीन्ह करमन क फल देइ।
    उ मनइयन क जउन मिलइ चाही, देइ।
¹² उ फुरइ अहइ परमेस्सर कबहुँ बुरा कारज नाहीं करत ह।
    सर्वसक्तीसाली परमेस्सर सदा निस्पच्छ रही।
¹³ कउनो इनसान ओका धरती क प्रभारी नाहीं बनाएस।
    कउनो भी मनई ओका इ सचमुच जगत क जिम्मेदारी नाहीं दिहस।
¹⁴ अगर परमेस्सर ठान लेत
    तउ उ लोगन स जिन्नगी क साँस लइ लेत ह।
¹⁵ तउ धरती क सबहिं मनई मर जातेन,
    फिन सबहिं लोग माटी बन जातेन।

¹⁶ “अगर तू पचे विवेकी अहा
    तउ तू पचे ओका सुनब्या जेका मइँ कहत हउँ।
¹⁷ अइसा कउनो मनई जउन निआउ स घिना राखत ह
    सासक नाहीं बन सकत ह।
    अय्यूब, का तू सोचत अहा कि तू परमेस्सर क दोखी साबित कइ सकत अहइ?
¹⁸ सिरिफ परमेस्सर अइसा अहइ जउन राजा लोगन स कहत रहत ह कि ‘तू पचे बेकार अहइ।’
    परमेस्सर नेता लोगन स कहत रहत ह कि ‘तू पचे दुस्ट अहा।’
¹⁹ परमेस्सर प्रमुखन स दूसर मनइयन क अपेच्छा अधिक पिरेम नाहीं करत,
    अउर परमेस्सर धन्नासेठन क अपेच्छा गरीबन स जियादा पिरेम नाहीं करत ह।
    काहेकि सबहिं क परमेस्सर रचेस ह।
²⁰ होइ सकत ह रात मँ अचानक कउनो मनई मरि जाइ।
    परमेस्सर बहोत जल्दी ही लोगन क रोगी करत ह अउर उ पचे प्राण तउ देत हीं।
    परमेस्सर बगइर कउनो जतन क सक्तीसाली लोगन क उठाइ लइ जात ह।

²¹ “मनई जउन करत ह परमेस्सर ओका देखत ह।
    मनई जउन भी चरण उठावत ह परमेस्सर ओका जानत ह।
²² कउनो जगहिया अइसी अँधियारा नाहीं अहइ, चाहे उ जगह कइसा भी अँधियारा होइ,
    जेह मँ कि कउनो भी दुस्ट मनई अपने क परमेस्सर स छुपाइ पावइस।
²³ कउनो मनई बरे इ उचित नाहीं
    कि उ परमेस्सर स निआउ क अदालत मँ मिलइ क समइ निहचित करइ।
²⁴ परमेस्सर क प्रस्नन क पूछइ क जरुरत नाहीं,
    मुला परमेस्सर बरिआरन क नस्ट करी
अउर ओनकर जगह पइ
    कउनो अउर क बइठाई।
²⁵ तउ परमेस्सर जानत ह कि लोग का कर हीं।
    एह बरे परमेस्सर राति मँ दुस्टन क हराई, अउर ओनका नस्ट कइ देइ।
²⁶ परमेस्सर बुरे लोगन क ओनके बुरे करमन क कारण नस्ट कइ देइ
    अउर बुरे मनई क सजा क सब लखइ देइ।
²⁷ काहेकि बुरे लोग परमेस्सर क आग्या मनाइ क तजि दिहेन
    अउर उ पचे बुरे लोग परवाह नाहीं करत हीं ओन कामन क करइ क जेनका परमेस्सर चाहत ह।
²⁸ ओन बुरे लोग गरीबन क दुःख दिहन अउर ओनका मजबूर किहन परमेस्सर क मदद बरे गोहरावइ क।
    गरीब मदद बरे गोहरावत ह, तउ परमेस्सर ओकर सुनत ह।
²⁹ जब परमेस्सर खामोस रही क फइसला करत ह
    तउ कउनो मनई परमेस्सर क दोखी नाहीं ठहराइ सकत ह।
अगर परमेस्सर आपना मुख छिपा लेत ह
    तउ कउनो भी रास्ट्र या कउनो मनई ओका नाहीं पाइ सकत ह।
³⁰ तउ फुन एक ठु अइसा मनई अहइ जउन परमेस्सर क खिलाफ अहइ अउर लोगन पइ जुलम करत ह।
    तउ परमेस्सर ओका राजा बनइ नाहीं गइ सकत ह।

³¹ “होइ सकत ह कि कउनो परमेस्सर स कहइ,
    ‘मइँ अपराधी हउँ अउर फुन मइँ पाप नाहीं करब।
³² हे परमेस्सर, तू मोका उ सबइ बातन सिखावा जउन मइँ नाहीं जानत हउँ।
    अगर मइँ कछू बुरा किहेउँ तउ फुन, मइँ ओका नाहीं करबउँ।’
³³ मुला अय्यूब, जब तू बदलइ क मना करत अहा,
    तउ क परमेस्सर तोहका वइसा प्रतिफल देइ, जइसा तू चाहत अहा?
इ तोहार फइसला अहइ इ मोर नाहीं अहइ।
    तू ही बतावा कि तू का सोचत अहा?
³⁴ कउनो भी मनई जेहमाँ विवेक अहइ अउर जउन समझत ह उ मोरे संग सहमत होइ।
    कउनो भी विवेकवाला मनई जउन मोर सुनत, उ कही,
³⁵ ‘अय्यूब, अबोध मनई क जइसी बातन करत अहा,
    जउन बातन अय्यूब करत ह ओऩमाँ कउनो सच्चाइ नाहीं।’
³⁶ मोर इ इच्छा अहइ कि अय्यूब क परखइ क अउर भी जियादा कस्ट दीन्ह जाइँ।
    काहेकि अय्यूब हमका अइसा जवाब देत ह, जइसा कउनो दुस्ट मनई जवाब देत होइ।
³⁷ अय्यूब पाप पइ किए जात ह अउर ओह पइ उ बगावत किहेस।
    तोहरे ही समन्वा उ परमेस्सर क खिलाफ बहोत सारे इलाजाम लगावत रहत ह।”