अय्यूब 17

Awadhi Bible: Easy-to-Read Version

17 “मोर जिउने कि इच्छा नस्ट कीन्ह ग अहइ।
    मोर प्राण लगभग जाइ चुका अहइ।
    कब्र मोर बाट जोहत अहइ।
² लोग मोका घेर लेत हीं अउर मोह पइ हँसत हीं।
    मइँ ओनका लखत हउँ जब लोग मोर अपमान करत हीं।

³ “परमेस्सर, मोर बेकसूर होइ क पुस्टि करा।
    मोर निर्दोख होइ क गवाही देइ बरे कउनो तइयार नाहीं होइ।
⁴ मोरे मीतन क मन तू मूदँ ल्या ह।
    एह बरे उ पचे जीत नाहीं सकब।
⁵ लोग जउन कहत ह उ तू जानत ह,
    ‘मनई आपन मीत क मदद करइ बरे
    आपन गदेलन क नज़र अन्दाज़ करत ह।’
⁶ परमेस्सर मोर नाउँ हर कउनो बरे अपसब्द बनाएस ह
    अउर लोग मोरे मुँहे पइ थूका करत हीं।
⁷ मोर आँखी लगभग आँधर होइ चुकी अहइ काहेकि मइँ बहोत दुःखी हउँ।
    मोर देह एक छाया क तरह दुर्बल होइ चुकी अहइ।
⁸ नीक लोगन ब्याकुल अहइं कि इ घटि सकत ह।
    निरअपराध लोग ओन क खिलाफ उत्तेजित अहइ।
    जउन परमेस्सर क मज़ाक उड़ावत ह।
⁹ मुला सज्जन नेकी क जिन्नगी जिअत रहहीं।
    निरापाराधी लोग सक्तीसाली होइ जइहीं।

¹⁰ “जदि तू लउटि आउब्या, तउ आवा।
    किन्तु मइँ दिखाउब कि तू पचन मँ स कउनो बुहिदमान नाहीं अहइँ।
¹¹ मोर जिन्नगी यो ही बीतन अहइ।
    मोर सबइ जोजना टूट गइ अहइँ अउर आसा चली गइ अहइ।
¹² हरेक चीज क उलझा दीन्ह ग ह,
    उ पचे रात क दिन कहत ह अउर प्रकास अँधियारा लिआवत ह।

¹³ “मइँ आसा करउँ कि कब्र मोर घर
    अउ अँधियारा मोर बिछउना होइ।
¹⁴ अगर मइँ कब्र स कहउँ, ‘तू मोरे बाप अहा,’
    अउर कीरा स ‘तू मोर महतारी अहा,’ या ‘तू मोर बहिन अहा।’
¹⁵ अगर उ मोर सिरिफ एक ठु आसा अहइ तबइ तु कउनो आसा मोका नाहीं अहइ
    अउर कउनो भी मनई मोरे बरे कउनो आसा नाहीं लखि सकत ह।
¹⁶ का मोर आसा भी मोरे संग मरि जाइ?
    का मइँ अउर मोरे आसा एक संग कब्र मँ मिलिहीं?”