अय्यूब 9

Awadhi Bible: Easy-to-Read Version

⁹ “परमेस्सर सप्तर्सि, मृगसिरा अउर कचपचिया तारन क बनाएस ह।
    उ ओन ग्रहन क बनाएस जउन दक्खिन क अकास पार करत हीं।
¹⁰ परमेस्सर अइसेन अदभुत करम करत ह जेनका मनई नाहीं समुझ सकत।
    परमेस्सर क महान अचरज भरे करमन क कउनो अन्त नाहीं अहइ।
¹¹ परमेस्सर जब मोरे लगे स निकरत ह तउ मइँ ओका लख नाहीं पावत हउँ।
    परमेस्सर जब मोरी बगल स निकरि जात ह तउ भी मइँ जान नाहीं पावत हउँ।
¹² अगर परमेस्सर छोरइ लागत ह तउ कउनो भी ओका रोक नाहीं सकत।
    कउनो भी ओहसे कह नाहीं सकत कि ‘तू का करत अहा?’
¹³ परमेस्सर आपन किरोध क रोकी नाहीं।
    हिआँ तलक कि राहाब^[a] क सहायक भी परमेस्सर क सक्ती क आगे झुकत ही।
¹⁴ एह बरे परमेस्सर स मइँ बहस नाहीं कइ सकत।
    मइँ नाही जानत कि ओहसे का कहा जाइ।
¹⁵ यद्दपि मइँ तउ निर्दोख अहउँ, मोरे लगे कउनो विकल्प नाहीं अहइ
    किन्तु ओहसे जउनो कि मोका निआव करत ह दाया क आग्रह कइ सकत हउँ।
    मइँ सिरिफ ओसे जउन मोर निआउ करत ह, दाया क भीख माँग सकत हउँ।
¹⁶ अगर मइँ ओका गोहरावउँ अउर उ जवाब देइ,
    तबहुँ मोका बिस्सास नाहीं होइ कि उ सच ही ओह पइ धियान देत ह, ‘जउन मइँ कहत हउँ।’
¹⁷ परमेस्सर मोका कुचरइ बरे तूफान पठइ
    अउर उ मोका अकारण ही जियादा घाव देइ।
¹⁸ परमेस्सर मोका फुन साँस नाहीं लेइ देइ।
    उ मोका अउर जियादा दुख देइ।
¹⁹ कउनो मनई परमेस्सर क सक्ती क मुकाबला मँ
    हराइ नाहीं सकत ह।
कउनो मनई परमेस्सर क अदालत मँ लइ बरे
    मजबूर नाहीं कइ सकत ह।
²⁰ चाहे मइँ निर्दोख अहउँ, जउन कछू भी मइँ कहत हउँ उ मोका दोखी ठहराउब।
    चाहे मइँ कउनो बुरा काम नाहीं किहा, उ मोका भ्रस्ट क जइसा बनाउब्या।
²¹ मइँ पाप रहित हउँ।
मुला मोका आपन ही परवाह नाहीं अहइ
    मइँ खुद आपन ही जिन्नगी स घिना करत हउँ।
²² मइँ खुद स कहत हउँ, ‘हर कउनो क संग एक समान ही घटित होइ।
    निरपराध लोग वइसेन ही मरत हीं जइसे अपराधी मरत हीं।
    परमेस्सर ओन सबक जिन्नगी क अन्त करत ह।’
²³ का परमेस्सर मज़ाक करत ह जब अचानक विपत्ति आवत अउर कउनो निर्दोख मनई मारा जात ह
²⁴ अगर निआधीस क आँखिन क ढाँपि दीन्ह जाइ तउ धरती पइ दुट्ठन क राज होइ जाब्या।
    अगर इ परमेस्सर नाहीं किहस, तउ फुन कउन किहस ह?

²⁵ “कउनो तेज धावक स तेज मोर दिन परात अहइँ।
    मोर दिन उड़िके बीतत अहइँ अउर ओनमाँ कउनो खुसी नाहीं अहइँ।
²⁶ तेजी स मोर दिन बीतत अहइँ जइसे भोजपत्र क नाब बहत चली जात ह।
    मोर दिन अइसे हीं बीतत अहइँ जइसे उकाब आपन सिकारे पइ टूट पड़त होइ!

²⁷ “जदि मइँ कह सकब, ‘मइ सिकाइत नाहीं करब।
    मइँ आपन दर्द भुल जाब।
    अउर खुस होइ जाब्या।’
²⁸ किन्तु मइँ अबहुँ तलक पीरा स डेरात हउँ
    काहेकि मइँ जानत हउँ कि अबहुँ भी तू (परमेस्सर) मोका निर्दोख नाहीं बनाउब्या।
²⁹ मइँ परमेस्सर क संग आपन दलील क खोइ देब।
    तउ कोसिस करइ मँ मोका आपन समइ काहे बरबाद करइ चाही।
³⁰ चाहे मइँ आपन हाथ धोइ बरे सबन त सुद्ध पानी
    अउर बड़िया साबुन क प्रयोग करा।
³¹ फुन भी परमेस्सर मोका घिनौना गड़हा मँ ढकेल देइ
    जहाँ मोर ओढ़ना तलक मोहसे घिना करिहीं।
³² परमेस्सर, मोर जइसा मनई नाहीं अहइ।
एह बरे ओका मइँ जवाब नाहीं दइ सकत।
    हम दुइनउँ अदालत मँ एक दूसरे स मिल सकित नाहीं।
³³ हुवाँ कउनो एक बिचौलिया नाहीं जउन हमार बीच क बातन सुन सकत।
    हुवाँ कउनो एक नाहीं जउन हम दुइनउँ क ऊपर अधिकार रखइ सकत।
³⁴ अगर परमेस्सर मोका सज़ा देइ बन्द कइ देइ,
    अउर उ मोका बहोत जियादा नाहीं डेरावइ।
³⁵ तब मइँ बगैर डरे परमेस्सर स उ सब कहि सकत हउँ,
    काहेकि मइँ जानत हउँ कि मइँ अइसा दोखी नाहीं हउँ जइसा मोह क दोखी ठहराइ गवा ह।