Add parallel Print Page Options

बिलाम अउ मोअब क राजा

22 तब इस्राएल क मनइयन मोआब क समतल स होइ के यरदन नदी क पार यरीहो तलक जात्रा किहेन। 2-3 सिप्पोर क पूत बालाक उ सब लखेस जेका इस्राएल क मनइयन एमोरी मनइयन क संग किहे रहेन। मोआब बहोतइ जियादा डेराइ ग रहा काहे की हुवाँ इस्राएल क बहोत मनई रहेन। मोआब इस्राएल क लोगन स बहोत ससान रहा।

मोआब क राजा मिद्यान क नेता लोगन स कहेस, “मनइयन क इ बड़का झुण्ड हमरे चारिहुँ कइँती क सब चीज क वइसे ही बरबाद कइ देइ जइसे कउनो गइया खेते क घास चरि जात ह।”

इ टेमॅ सिपोर क पूत बालाक मोआब क राजा रहा। उ कछू मनइयन क बोर क पूत बिलाम क बोलावइ बरे पठाएस। बिलाम फरात नदी क निअरे पतोर नाउँ क पहँटा मँ रहा। बालाक कहेस,

“मनइयन क एक नवा रास्ट्र मिस्र स आवा ह। उ पचे ऍतना जियादा अहइँ कि समूचइ प्रदेस मँ संचर सकत हीं। उ पचे ठीक हमरे निअरे सिबिर डाए अहइँ। आवा अउ इ मनइयन क संग भिड़इ मँ मोर मदद करा। उ पचे मोर ताकत स जियादा बरिआर ताकत वाला अहइँ। इ होइ सकत ह कि तब मइँ ऍनका हराइ सकउँ। तब मइँ ओनका आपन देस छोड़इ क मजबूर कइ सकउँ। मइँ जानत अहउँ कि तू बड़की ताकत धरत ह। अगर तू कउनो मनई क आसीर्बाद देइ तउ उ आसीसित होइ, अगर तू कउनो मनई क सराप देइ तउ उ मनई सापित होइ।[a] एह बरे आवा अउ इ मनइयन क सराप देइ।”

मोआब अउ मिद्यान क नेतन बालाम स मिलइ बरे गएन अउर आपन संग जादूइ सेवा क फीस भी लइ गएन। तब उ पचे, बालाक जउन कछू कहे रहा, ओसे कहेन।

बिलाम ओनसे कहेस, “हिआँ रात भइ ठहरा। मइँ यहोवा स बात करब अउर जउन जवाब, उ पचे मोका देइहीं, उ तोहसे कहब।” एह बरे उ रात मोआबियन क नेता ओनके संग ठहरेन।

परमेस्सर बिलाम क लगे आवा अउ उ पूछेस, “तोहरे संग इ सबइ कउन लोग अहइँ?”

10 बिलाम परमेस्सर स कहेस, “मोआब क राजा सिपोर क पूत बालाक एक संदेसा मोका देइ बरे ओनका पठए अहइ। 11 सँदेसा इ अहइ: मनइयन क एक ठु नवा रास्ट्र मिस्र स आवा अहइ। उ पचे ऍतना जियादा अहइँ कि समूचइ देस मँ फइलि सकत हीं। एह बरे आवा अउ इ मनइयन क खिलाफ कछू कहा। इ होइ सकत ह ओनसे लड़इ मँ मइँ समर्थ होइ सकउँ अउ आपन देस तजि देइ क ओनका मजबूर कइ सकउँ।”

12 मुला परमेस्सर बिलाम स कहेस, “ओनके संग जिन जा। तू ओनका सराप नाहीं देइ चाही, काहेकि उ आसीर्बाद पाएस ह।”

13 दूसर दिन बिलाम उठा अउ बालाक क नेता स कहेस, “अपने देस क लउटि जा। यहोवा मोका तोहरे संग नाहीं जाइ देइहीं।”

14 एह बरे मोआबी नेता बालाक क लगे लउटि गएन अउ ओसे इ बात किहेन। उ पचे कहेन, “बिलाम हम सबन क संग आवइ स मना कइ दिहे अहइ।”

15 एह बरे बालाक दूसर नेता लोगन क बिलाम क लगे पठाएस। इ दाई उ पहिली दाई क अपेच्छा बहोत ढेर क मनई पठाएस। अउर इ नेता लोग पहिली दाई क अपेच्छा जियादा सम्मान्न रहेन। 16 उ सबइ बिलाम क निअरे गएन अउ कहेन: “जिपोर क पूत बालाक तोहसे कहत ह: कृपा कइके आपन क हिआँ आवइ स कउनो क रोकइ जिन द्या। 17 जउन मइँ तोहसे माँगत अहउँ जदि तू उ करब्या तउ मइँ तोहका बहोत जियादा भुगतान करब। आवा अउ इ मनइयन क खिलाफ मोरे बरे कछू कहा।”

18 मुला बिलाम उ मनइयन क जवाब दिहस। उ कहेस, “मोका यहोवा मोरे परमेस्सर क आग्या मानइ चाही। मइँ ओकरे हुकुम क खिलाफ कछू नाहीं कइ सकत हउँ। मइँ बड़का-छोटका कछू भी तब तलक नाहीं कइ सकत जब तलक परमेस्सर नाहीं कहत कि मइँ ओका कइ सकत हउँ। अगर राजा बालाक आपन सोना चाँदी भी सुन्दर घर क भी दइ देइ तउ भी मइँ आपन परमेस्सर यहोवा क हुकुम क खिलाफ कछू नाहीं करब। 19 मुला तू भी ओन दूसर लोगन क तरह आज क रात हिआँ ठहर सकत ह। अउ रात मँ मइँ जान जाब कि यहोवा मोहसे क कहवावइ चाहत ह।”

20 उ रात परमेस्सर बिलाम क लगे आवा। परमेस्सर कहेस, “इ लोग अपने संग लइ जाइ बरे कहइ खातिर फुन आवा अहइँ। एह बरे तू ओनके संग जाइ सकत ह मुला सिरिफ उहइ करा जउन मइँ तोहसे करइ क कहउँ।”

बिलाम अउ ओकर गदहा

21 दूसरे भिन्सारे बिलाम उठा अउ अपने गदहा प काठी धरेस। तब उ भी मोआबी नेता लोगन क संग गवा। 22 बिलाम आपन गदहा प सवार रहा। ओकरे नउकरन मँ स दुइ ठु ओकर संग रहेन। जब बिलाम जात्रा करत रहा तउ परमेस्सर ओन प कोहाइ गवा। एह बरे यहोवा क सरगदूत बिलाम क समन्वा सड़के प खड़ा होइ गवा। सरगदूत बिलाम क रोकइ जात रहा।

23 बिलाम क गदहा यहोवा क सरगदूत क सड़क प खड़ा देखेस। सरगदूत क हाथ मँ एक तरवार रही। एह बरे सड़क स मुड़ा अउ खेत मँ चला गवा। बिलाम सरगदूत क नाहीं लख सकत रहा। एह बरे उ गदहा प बहोत कोहान। उ गदहा क पीटेस अउ ओका सड़क प लउटइ क मजबूर किहस।

24 पाछे यहोवा क सरगदूत अइसी जगह प खड़ा भवा जहाँ सड़क संकरी होइ गइ रही। इ दुइ अंगूर क बगियन क बीच क ठउर रहा। हुवाँ सड़क क दुइनउँ ओर देवार रहिन। 25 गदहा यहोवा क सरगदूत क फुन निहारेस। एह बरे गदहा एक देवारे स चिपकिके निकरा। ऍहसे बिलाम क गोड़ देवारे स पिचक गवा। एह बरे आपन गदहा क फुन स पीटेस। 26 ऍकरे पाछे यहोवा क सरगदूत दूसर ठउर प खड़ा भवा। इ दूसर जहग रही जहाँ सड़क सॅकराइ ग रही। हुवाँ कउनो अइसी जगह नाहीं रही जहाँ गदहा मुड़ सकइ। 27 गदहा यहोवा क सरगदूत क लखेस। एह बरे गदहा बिलाम क आपन पीठ प लइके जमिन प बइठि गवा। बिलाम गदहा पर बहोतइ कोहान रहा। एह बरे उ ओका लाठी स पीटि डाएस।

28 तब यहोवा गदहा क बोलइवाला बनाएस। गदहा बिलाम स कहेस, “तू मोहे प काहे कोहान अहा। मइँ तोहरे संग का किहउँ ह? तू मोका तीन दाई मार्या ह।”

29 बिलाम गदहा क उत्तर दिहस, “तू मोर मज़ाक उड़ाएस ह, तू मोका गलत ठहराएस ह। जदि मोरे हाथे मँ अबहिं सिरिफ एक तरवार होत तउ मइँ अबहिं तोहका मारि डाइत।”

30 मुला गदहा बिलाम स कहेस, “मइँ तोहार आपन गदहा अहउँ, जेह प तू आपन सारा जिन्नगी सवार भवा ह। अउर तू जानत ह कि मइँ अइसा ऍकरे पहिले कबहुँ नाहीं किहेउँ ह।”

“इ सही अहइ।” बिलाम कहेस।

31 तब यहोवा बिलाम क सड़क प खड़ा सरगदूत क लखइ दिहस। बिलाम सरगदूत अउ ओकर तरवारि निहारेस। तब बिलाम निहुरिके पैलगी किहस।

32 तब यहोवा क सरगदूत बिलाम स पूछेस, “तू आपन गदहा क तीन दाई काहे मार्या ह? मइँ तोहका रोकइ बरे हिआँ आवा अहउँ। काहेकि तोहार जात्रा मोर आदेस क खिलाफ अहइ। 33 गधा मोका लखेस। अगर गदहा न मुड़ा होत तउ मइँ तोहका मारि डाए होतेउँ। मुला मोका तोहरे गदहा क नाहीं मारइ क रहा।”

34 तब बिलाम यहोवा क सरगदूते स कहेस, “मइँ पाप किहेउँ ह। मइँ इ नाहीं जानत रहेउँ कि तू सड़क प खड़ा अहा। अगर मइँ बुरा करत अहउँ तउ मइँ घर लउटि जाब।”

35 यहोवा क सरगदूत बिलाम स कहेस, “नाहीं, तू इ मनइयन क संग जाइ सकत ह। मुला होसियार रहा। सिरिफ उ बातन क कहा जउन मइँ तोहसे कहइ बरे कहुब।” एह बरे बिलाम बालाक क जरिये पठए गए नेता लोगन क संग गवा।

36 बालाक सुनेस कि बिलाम आवत अहइ। एह बरे बालाक ओसे मिलइ बरे अर्नोन नदी क निअरे मोआबी सहर गवा। इ ओकरे देस क उत्तरी छोरे प रहा। 37 जब बालाक बिलाम क लखेस तउ उ बिलाम स कहेस, “मइँ एकरे पहिले आप स आवइ क कहेउँ रहा अउर इ भी बताएउँ रहा कि इ बहोत जियादा महत्व स भरा बाटइ। आप हमरे लगे काहे नाहीं आएन? का मइँ तोहका धन देइ क जोग्य नाहीं अहइ?”

38 मुला बिलाम उत्तर दिहस, “मइँ अब तोहरे लगे आवा अहउँ। मुला मइँ, जउन तू करइ क कहे रहा ओहमाँ स, साइद, कछू भी न कइ सकउँ। मइँ सिरिफ उहइ बातन तोहसे कइ सकत हउँ जउन यहोवा परमेस्सर मोसे कहइ क बताएस ह।”

39 तब बिलाम बालाक क किर्यथूसोत गवा। 40 बालाक कछू गोरु अउ कछू भेड़िन ओकरे भेंट क रूप मँ मारेस। उ कछू गोस बिलाम अउ कछू ओकरे संग क नेता लोगन क दिहस।

41 दूसरे भिन्सारे बालाक बिलाम क बमोत बाल नगर लइ गवा। उ सहर स उ पचे इस्राएली मनइयन क कछू सिबिर क लखि सकत रहेन।

Footnotes

  1. 22:6 अगर तू … होइ इ उ वाचा क कइँती इसारा करत ह जउन परमेस्सर इब्राहीम क संग उत्पत्ति 12:3 मँ किहेस ह “मइँ ओका आसिस देब जउन तोहका आसिस देत ह, मइँ ओका सराप देब जउन तोहका सराप देत ह।”