1 Timoteo 4

Ne Bibliaj Tik Nawat

Ne tajpialis ipal ne tejkia tik ne Sennemit

4 Ne Ijiutzin ina melaknaj ka tik ne tijtipan tunal, sejse yawit kiajkawat ne tayulmatilis, wan yawit kikejketzat najnawal tashijshikuat wan tajtamachtilis ipal najnawal teyek ² ne tashijshikuat wan inat sajsanka. Ne intasenmatilis muchichinujtuk. ³ Inat ma te timunamiktikan; ma te tikwakan tajtakwal ne kichijtuk ne Teut pal tikwikan wan pal tinat panpadiush tejemet ká titayulmatit wan tikmatit ne tejkia, ⁴ ika muchi tay kichijki Teut yaja yek, wan te nemi pal tinat inte tiknekit su tinatiwit panpadiush kwak tikwit, ⁵ ika muteuchiwa iwan ipalabraj Teut wan teutajtanilis.

⁶ Su tikinhelnamiktilia ini ne tukniwan, tiaw tiyek tekitini ipal ne Mawaltijtuk Yeshu, iskalijtuk tik ne pajpalabraj ipal tayulmatilis wan ne yek tamachtilis ne tiktakamattuk. ⁷ Maka shikaki ne cuejcuentoj te tatka ipatiw ipal lamatket. Shimuejeku pal shimuchiwa yek, ⁸ ika ne muejekulis ipal ne tuweyka techpalewia chiupi, wan su timuwikat yek, uni kia techpalewia pal muchi wan techmaka ka tiwelit tiyujyultuk ashan wan tik ne tujtunal witzet. ⁹ Ini tejkia wan nemi pal muchi tikmatit. ¹⁰ Yaja taika tikujkutiat wan timutatejtemuiliat, ika tikpishtiwit tejchialis tik ne Teut yultuk ne kinmakishtia muchi ne takamet, wan ne tayulmatit sujsul mas.

¹¹ Shitatukti wan shitamachti ini. ¹² Ma te aka metzijilwi ika taja sea tipiltzin, sute shimuchiwa se ejemploj ipal ne tayulmatit tik mupalabraj, tik mumuwikalis, tik mutetasujtalis, tik mutayulmatilis, tik muchipawaknemilis. ¹³ Hasta ma niajsi, shiktali cuidadoj ma shiamatachia, ma shitanawati, ma shitamachti. ¹⁴ Shikwi ne tetakulis ne metzmakatiwit iwan teutaketzalis kwak mutalijket mujpak ne inmejmey ne noymet. ¹⁵ Muchi uni shikejketza wan shikchiwa pal kiane muchi yawit kitat ken metzpalewijtuk. ¹⁶ Shimutajpia wan shiktajpia ne tamachtilis; shikchiwa senpa ijkiuni; ika su kiane, taja tiaw timumakishtia wan nusan tiaw tikinmakishtia ne metzkakisket.