Add parallel Print Page Options

Совети за духовните пастири и за младите луѓе

Сакам да ги охрабрам црковните старешини. И јас сум старешина, сведок на страдањето на Христос и знам дека кога повторно ќе дојде и мене ќе ме огрее Неговата слава. Затоа ве молам, како што овчарот се грижи за своето стадо, така и вие да се грижите за оние што ви се од Бога доверени. Правете го тоа од се срце, а не безволно. Грижете се за нив ревносно, заради Бог, а не од желба за печалба. Не господарете над луѓето што ви се доверени, туку бидете му пример на стадото. А кога ќе дојде Христос, Врховниот Пастир, вие ќе добиете венец што никогаш не свенува - божествена слава[a].

Вие што сте помлади, слушајте ги старешините. Всушност, сите треба понизно да си помагате еден на друг, зашто:

„Бог на горделивите им се противставува,

а спрема понизните е благонаклонет[b].“

Бидете понизни пред Божјата моќна рака, за Бог да ве воздигне кога за тоа ќе дојде време. Се што ве вознемирува препуштете Му го Нему. Тој се грижи за вас.

Бидете трезвени и постојано на штрек! Внимавајте! Вашиот непријател, Ѓаволот, како разјарен лав обиколува и си бара жртва за растргнување. Спротивете му се, без да се колебате во верата. Вие знаете дека христијаните во целиот свет минуваат низ истите страдања! 10 Во Својата љубезност, Бог ве повика, преку Исус Христос, да бидете дел од Неговата вечна слава. Откако кратко време ќе истрпите, Тој ќе ве усоврши, ќе ве поткрепи, ќе ве направи цврсти и непоколебливи. 11 Тој владее над се, сега и за вечни времиња. Амин.

Поздрави

12 Ова кратко писмо ви го пишувам со помош на Силван, кого го сметам за верен брат. Сакав да ве охрабрам и да ве уверам дека ја имате Божјата благонаклоност.

13 Ве поздравува вашата сестринска црква од Рим[c].

Ве поздравува и Марко. Тој ми е како син.

14 Поздравете се меѓусебно со искрени изрази[d] на христијанска љубов.

На сите што сте Христови следбеници ви посакувам мир.

( Амин.)

Footnotes

  1. 1 Петар 5:4 Во грчкиот текст: венец.
  2. 1 Петар 5:5 Поговорки (или: Изреки Соломонови) 3:34.
  3. 1 Петар 5:13 Буквално: Вавилон. Ова најверојатно е симболичко име за градот Рим.
  4. 1 Петар 5:14 Буквално: со бакнеж.