1 Korinto 2

Ne Bibliaj Tik Nawat

2 Kwak naja niajsik anmutech, nukniwan, te iwan pajpalabraj wey o wey tamatilis nimetzinnawatij ne ichtaka ipal ne Teut, ² ika ninak ka te niaw nikmati tatka ijtik anmejemet, sema Yeshu Mawaltijtuk wan yajaya cruzpilujtuk. ³ Wan naja nikukushki wan nimajmawki wan nijtzilikak sujsul anmutech, ⁴ wan ne nupalabraj wan ne nutanajnawatilis te nimetzinhilwij iwan pajpalabraj ipal tamatilis sute sema nimetzinhilwitilij iijiu wan itajpal, ⁵ pal kiane ma shitayulmatikan te ipanpa itamatilis takamet sute ipanpa itajpal Teut.

⁶ Ijtik ne ujuksituk kia titanutzat iwan tamatilis: ne itamatilis ini taltikpak te, nian ne itamatilis ne tatuktianimet ipal ini taltikpak ká puliwit, ⁷ sute titanutzat iwan ne itamatilis Teut ken se ichtaka, ken se inashtuk, tay ne tatuktij ne Teut kwak teuk pejki muchi, pal titzitzinakat, ⁸ wan nian se ipal ne tatuktianimet ipal ne taltikpak kimati katka, ika su kimattuskiat, te kicruzpilujtuskiat ne Tajtzin tzitzinaka.

⁹ Wan ken muijkwilujtuk:

¹⁰ tejemet techneshtilijtuk ne Teut itech ne Ijiutzin, ika ne Ijiutzin kimati muchi hasta ne tay muilwia ne Teut tik iyulu. ¹¹ Ika ká kimati tay kipia se takat tik iyulu, sute ne iijiu uni takat ne nemi ijtik yaja? Wan ijkiuni te aka kimati tay kipia ne Teut tik iyulu sute ne iijiu ne Teut. ¹² Tejemet te tikwijtiwit ne iijiu ne taltikpak sute ne Ijiutzin ne kistuk itech ne Teut, pal tikishmatit ne tay techtakulijtuk ne Teut.

¹³ Wan tay ne titanutzat, te tinat tik pajpalabraj timumachtijtiwit itech itamatilis takat sute tay ne timumachtijtiwit itech Ijiutzin, wan tiksenpepetat tay ipal tuijiu iwan tay ipal tuijiu. ¹⁴ Ne takat ne isel itunal kipia te kikwi tay ipal ne Iijiutzin ne Teut, ika ina ka ipal melemet, nian weli kishmati, ika sema iwan tuijiu weli muishketza. ¹⁵ Ká ne kipia iijiu kishketza muchi; wan yajane te aka weli kishketza.

Tejemet tikpiat ne itamatilis ne Mawaltijtuk.