1 Korinto 4

Ne Bibliaj Tik Nawat

4 Ma techishkejketza se ken itejtekitini ne Mawaltijtuk wan kalpianimet ipal ijichtaka Teut. ² Nikan mutemua ijtik ne kalpianimet ma se muajsi melawak. ³ Nupal tel, su anhinat su naja niyek o te, te kineki ina tatka, nian su ina se kalpuli ipal takamet; naja nusan te nimupepeta nusel, ⁴ ika naja te nimumaka cuentaj, melka uni te kineki ina ka naja niyek! Ká ne ina su niyek, yaja ne Tajtzin. ⁵ Yajika maka shikchiwakan juzgar achtu ma wiki ne Tajtzin, ká yawi kitawilua tay minashtuk tik takumi wan yawi kineshtia tay kinekit ne tuyujyulu, wan kwakuni ne Teut yawi ina ka tiyejyek sejse ika.

⁶ Muchi uni, nukniwan, ninatuk nupanpa wan ipanpa Apolos ka anmumaku pal anmumachtiat tuwan ini: ma te shiktalikan tatka ijpak ne tay muijkwilujtuk, pal te anmuishpitzat ne se ijpak ne seuk pal ankitenewat ne sekit. ⁷ Ika ká metzishtemua? Tay tikpia tay te metzmakatiwit? Taika timuweymati ken su te metzmakatuskiat?

⁸ Anhishwitiwita! Ankipiata wey! Anmukweptiwit tatuktianimet wan tejemet inte!

Naja niknekiskia ma ijkia, ika su anmejemet tatuktiskiat, tejemet nusan titatuktiskiat anmuwan!

⁹ Ika nimutajtanilia su ne Teut techilwitijtuk ne tijtitanijtuk ken ne tijtipan wan ne yawit mikit, ika timuchijtiwit sejse pal muchi tachiat wan techpakiliat, tanawatianimet wan takamet kenha: ¹⁰ tejemet timejmelemet ipal ne Mawaltijtuk, anmejemet ne kimatit tay muneki muchiwa ipal ne Mawaltijtuk; tejemet te tiwelit tatka, anmejemet ne tajtajpaltik; anmejemet ne yejyek, tejemet te! ¹¹ Hasta seman kenhayuk timayanat wan tiamikit wan tipejpetznaj wan techchajchaluat wan te tikpiat kal ¹² wan tikujkutiat titekitit iwan tujtumey; techtejtenewat, wan tinat ka wey; techtalultiat, wan muchi tikseliat; ¹³ inat tay teyek tupanpa, wan timutajtaweliat; timuchijtiwit ken ijijishtuk ipal muchi wan tajtalmatznaj hasta ashan.

¹⁴ Te nikijkwilua ini ma shishpinawakan sute pal nimetzinnawatia ken nupilawan ká niktasujta, ¹⁵ ika melka ankipiat miak tamachtiani ipal ne Mawaltijtuk, chiupi anmuteku ankipiat. Naja nimetzinpunijtuk itech ne Mawaltijtuk Yeshu iwan ne yeknawatilis. ¹⁶ Nimetzintajtani tel ma shimuchiwakan ken naja. ¹⁷ Yajika niktuktijtuk Timoteo anmutech. Yaja nukunew tasujtatuk, wan yulmelawak tik ne Tajtzin. Yaja yawi metzinneshtilia nujnuuj tik ne Mawaltijtuk Yeshu, kenha ken nujme nitamachtia tik muchi ne sejsennemit.

¹⁸ Ken su te niajsiskia anmutech muishpitztiwit sejse. ¹⁹ Niaw niajsi anmutech talul, su ne Tajtzin kineki, wan niaw nikishmati te ne inpajpalabraj ne muishpitztiwit sute ne intajpal, ²⁰ ika te tik pajpalabraj nemi ne itatekimakalis ne Teut sute tik itajpal. ²¹ Tay ankinekit? Ma niajsi anmutech iwan se kwawit o iwan tetasujtalis wan se nuijiu yulyamanik?