1 Tesalonika 4

Ne Bibliaj Tik Nawat

Shimutasujtakan, shisentekitikan

4 Pal tami, tel, nukniwan, ini timetzintajtanit wan timutajtaweliat ipanpa tajtzin Yeshu: ka ijkiunisan ken timetzinhilwijket ken yek ma shimuwikakan pal ankipaktiat Teut, wan nusan ken anmuwikat, ma shikchiwakan ijkiuni mas, ² ika ankimatit tay timetzintuktijtiwit itech imey ne tajtzin Yeshu, ³ ika ini tay kielewia ne Teut, pal ma shimuchiwakan ipal ne Teut: ma te shitatzinhejenchiwakan, ⁴ ma sejse pal anmejemet weli kipia yek iweyka ken kineki ne Teut: ⁵ tesu ken kineki ne taelewilis, ken ne tejtechan ne te kishmatit ne Teut; ⁶ wan ma te aka kichiwa tay te muneki iwan ne iiknew wan ma te kishijshiku tik itekiw, ika ne Tajtzin tetzunkwi ipanpa muchi uni, ijkiunisan ken tinaket pal ankimatit. ⁷ Ika te metzinnutzki ne Teut pal ankichiwat tay susul sute pal anmuchiwat ipal Teut. ⁸ Yajika tel, ká ina te, te kilwia te ne takamet sute ne Teut ká techmakak ne Iijiutzin.

⁹ Ipanpa ne iknitasujtalis te anmunekit ma tikijkwilukan tatka anmupal, ika ankipiata teumachtilis pal ma shimutasujtakan, ¹⁰ wan ijkia ankichiwat iwan muchi ne tukniwan ne nemit nujme Macedonia. Yek, nukniwan, timetzintajtanit ma shikchiwakan mas, ¹¹ wan ma shikchiwakan tay welit pal annejmachnemit, wan pal ankichiwat tay anmupal, wan pal anmejemetsan tekitit iwan anmumejmey ijkiunisan ken timetzintuktijtiwit, ¹² ma shimuwikakan yek iwan ne nemit tatenpan wan ma te shimunekikan tatka.

Ken ijtuk iwan ne miktiwit

¹³ Tiknekiskiat ma shikmatikan, nukniwan, ken ijtuk iwan ne mijmikini pal te metzinkukua ijkiuni ken ne sekit te kipiat tejchialis, ¹⁴ ika su tikmatit ka Yeshu miktuk wan yaja muketztuk, kineki ina ka ne Teut nusan yawi kinwika ne mijmikini ká ipal Yeshu iwan.

¹⁵ Ika timetzinhilwia ini tay ina ne Tajtzin: ka tejemet ká yujyultuk, ne nakat hasta ma wiki ne Tajtzin, te tiawit tiajsit iishpan ne mijmikini, ¹⁶ ika ne Tajtzin yawi waltemu tik ne ilwikak tatuktia iwan ikupak weytanawatiani wan yawi tzalani itrompetaj ne Teut, wan ne mijmikini ipal ne Mawaltijtuk yawit muyulkwit achtu; ¹⁷ tipan yawi techitzkia tik ne mijmishti tejemet ne yujyultuk ká nakat pal tiknamikit ne Tajtzin tik ne ejekat wan ijkiuni tiawit tinemit pal senpa iwan ne Tajtzin. ¹⁸ Kiane shimuyulpaktikan anmutzalan iwan ini pajpalabraj.