1 Timoteo 3

Ne Bibliaj Tik Nawat

Ne weymet ipal ne Sennemit

3 Tejkia ka su aka kineki muchiwa tapachiwiani, kielewia itekiw yek. ² Yajika tel, ne tapachiwiani muneki ma yaja se ká te aka weli kijilwia tatka; ishulejyu sanse isiwaw; kiuni chiupi; kipia itzuntekun yek; mutakentia ken muneki; muwika yek iwan ne ejkunimet; wan weli tamachtia. ³ Ma inte tawanani nian tasumani, sute yulyamanik; ma inte musuma; ma inte kitasujta ne tumin. ⁴ Se ká tatuktia yek tik ne ikal; se kipia ipilawan ká kitakamatit tik muchi ken muneki. ⁵ Asu se te weli tatuktia tik ne ikal, ken yawi tajpia ne sennemit ipal ne Teut? ⁶ Tesu se yankwik ne pejki tayulmati yewa, ika weli tzunsuluni wan wetzi tik imey ne Tamintuk. ⁷ Nusan muneki ma kitakan yek ne sejseuk ne tatenpan pal te yawit kilwiat tatka, wan yawi wetzi tik itajpewal ne Tamintuk.

⁸ Wan ne tekitinimet ipal ne Sennemit kenhaya: ma inakan tay muneki, ma te kipiakan ume innenepil, ma te ingustoj sujsul ne atata, ma te tuminhishtemuanimet. ⁹ Ma tajpiakan ne ichtaka ipal ne tayulmatilis iwan chipawak tasenmatilis. ¹⁰ Achtu, ma muejekukan yejemet, wan tipan ma tekitikan su te kichijtiwit tatka tay teyek.

¹¹ Ne siwatket kenhaya: ma taketzakan ken muneki, ma te tatenewat; ma kiunikan chiupi wan ma tayulmatikan ijtik muchi.

¹² Ne tekitinimet ma yejemet ishujshulejyu sanse isiwaw wan ma tatuktikan yek ijpak inpilawan wan tik ne inkal, ¹³ ika ká ne tekittiwit yek kipiasket se yek nivel wan wey melaknajyu tik tayulmatilis ipal ne Mawaltijtuk Yeshu.

¹⁴ Nitajkwilua pal nimetzilwia ini kwak nikmati ka niaw niajsi mutech talul, ¹⁵ wan su nishtuna, pal tikmati ken muneki ma timuwikakan ijtik ikal Teut. Yaja iteupan ne Teut Yultuk: ne taketzal wan ne tetzilnaj ipal ne tejkia. ¹⁶ Muchi tikmatit ka wey ne ichtaka ipal ne tay yek. Yaja muneshtij tik inakayu; kilwitij ka yek tik iijiu; tanawatianimet kitaket; munajnawatij ijtik tejtechan; muyulmatki ijtik taltikpak; mukwij tik tzitzinakalis.