1 Timoteo 5

Ne Bibliaj Tik Nawat

Ne tukniwan ijtik ne Sennemit

5 Maka shikajwa se chulet sute shiknutza ken muteku, wan ne piltzinmet ken muikawan, ² ne lamajtzitzinmet ken munajnan, ne siwapipil ken mueltiwan, senpa chipawak.

³ Shimuwika yek inwan siwatket ne nakatiwit insel ika mikik inshulejyu, su insel nemit. ⁴ Su se ijkiuni kipia ipilawan o imiakwan, ma mumachtikan ne achtu ka nemi pal timuwikat yek ka tuchan wan tikmakat ne tutejteku inpatiw, ika ijkiuni ne Teut kita yek. ⁵ Su tejkia ka se siwat kipulujtuk ishulejyu wan nakatuk isel, yaja yawi kipia tejchialis tik Teut wan senpa kitajtani wan mutajtawelia ka tayua wan ka tunal. ⁶ Ne siwat tea kipia ishulejyu su sema pajpaki, yaja miktuk melka yultuk. ⁷ Wan muchi ini shitamachti pal kiane yawit muwikat ken te aka welis kinhilwia tatka. ⁸ Su aka te tajpia yek imiakwan, wan ne kalchanejket sujsul mas, kinaktia ne tayulmatilis. Melka te yek ma se inte tayulmati, su kichiwa ijkiuni yaja ukchiupi teyek.

⁹ Se siwat ne intea kipia ishulejyu ma mupua semaya su kipiaya yeshpual shiwit wan su muchijtuk isiwaw sanse takat, ¹⁰ su tikmatit ka kichijtuk tay yek, su kiskalijtuk kukunet, su kikwijtuk ejkunimet tik ikal, su kikshipakatuk ne tayulmatit, su kinpalewijtuk ne mupitzinijtiwit, su kichijtuk muchi itekiw yek.

¹¹ Te ijkiuni ne siwatket ne nakatiwit insel wan kipiat chiupi shiwit, ika kwak pewat kielewiat se takat yawit kinekit munamiktiat wan kiajkawat ne Mawaltijtuk: ¹² yawit muchiwat juzgar ika kiajkawtiwit ne tayulmatilis ne kipiatuyat katka. ¹³ Nusan mumachtiat ma te tekitikan wan ma pashalukan tik se kal wan tik ukse kal, wan te sema ma te tekitikan sute nusan ma taketzakan tay te muneki pal chachalakat wan muishtukat tik tepal cuejcuentaj. ¹⁴ Yajika nikita yek ma munamiktikan ne siwatket kipiat chiupi shiwit, ma punikan wan ma muchiwakan itekuyu ikal, pal kiane te yawit kimakat ne kitejtenewa taika taijilwiskia. ¹⁵ Ika sejse muishkwepketa ipan ne Tenewani.

¹⁶ Su se tayulmati wan kipia siwatket nakatiwit insel, ma kintajpia wan ma te kitajtani ne sennemit ma kitashtawi, pal kiane weli kintajpia ne siwatket ne ijkia nemit insel.

¹⁷ Ne noymet ne tatuktiat yek ma kipiakan mas wey honor, wan ne kujkutiat tanutzat wan tamachtiat sujsul mas, ¹⁸ ika nemi ijkwilujtuk: "Ne wakash ne taksa nemi ijpak ne tawial, maka shiktentzakwa", wan nusan: "Yek ma kikwi ne tekitini ne ipatiw". ¹⁹ Su aka kijilwia se tatanoy, maka shitakaki sute su ume o yey inat kenha.

²⁰ Ne kichiwat tay te yek, shikajwa tik intachialis muchi pal kiane ne sejseuk nusan yawit majmawit.

²¹ Nimetznawatia tik itachialis ne Teut wan ne Mawaltijtuk Yeshu wan ne tanawatianimet ijishpejpentuk ma shitajpia muchi ini. Maka shikpia prejuicioj, maka shikpalewi ne se mas que ne seuk. ²² Maka shijisiwi tiktalia mujmumey ijpak aka. Su ajaka kichiwa tay te yek, maka shikpalewi. Shinaka chipawak.

²³ Ma intea shikuni isel at, sute shikwi chiupi atata ipal ne muijti wan ne mukujkukulisyu.

²⁴ Ne tay kichiwat sekit tay te yek muita nemanha wan muchiwa juzgar talul; ne tay kichijtiwit sekit semaya mumati tipan. ²⁵ Wan kenha, ne tay kichiwat sekit tay yek muita nemanha, wan ne tay kichijtiwit ne sekit nusan te weli minaya.