Ebrayujmet 9

Ne Bibliaj Tik Nawat

9 Ne achtu nusan kipiatuya sejse tay mutuktijtuyat ipal tekitilis tik ne teupan wan nusan ipal ne teupantzin. ² Muekchijki se tawipanti, ne achtu, wan ijtik yaja nemituyat ne tawilkal wan ne tepatznaj wan tajtamal ishpanujtuk; uni muilwia ne Teupan; ³ wan kan tipanut ijtik ukse kwachtzakka, se tawipanti ne muilwia ne Teupantzin, ⁴ ne kipia se pupuchkashit ipal teukwit wan ne takukal ipal ne sentaketzat ishtzaktuk nujme iwan teukwit, wan ijtik uni ne kumit ipal teukwit ne kipia ne manaj wan ne itupil Aaron ne mulinik, wan ne tejtepatznaj ipal ne sentaketzat. ⁵ Ijpak uni, kerubmet tzitzinakat, wan tik inhekawyu nemi ne tapupulwian. Ashkan inte welit titaketzat ipanpa muchi uni.

⁶ Kwak muekchijtuk ijkiuni, ne palejmet kalakit katka sejsenpa tik ne achtu tawipanti pal kichiwat ne tejtekitilis; ⁷ tik ne ukse tawipanti isel ne weypalej seujti tik ne shiwit, wan nemi pal kishinia esti ipanpa yajasan wan ne mujmuishpululisyu ne techan. ⁸ Ini tay kineki ina ne Ijiutzin: inteuk muneshtijtuk ne ujti ipal ne tayulmatit kwak kenhayuk naka ejkatuk ne achtu tawipanti. ⁹ Yajini se casoj ipal ne tujtunal pal ashkan, kan walmuwikat tejtetakulis ne inte welit kiyektiat tik itasenmatilis ká ne kichiwa uni tekitilis, ¹⁰ ne tachiat sema tay ipal ne takwal, ne tay tikunit, wan tajtapakalis wan tay ne mutuktijtuk ipanpa tuweyka, hasta ne tujtunal ipal tamelawalis.

¹¹ Kwak ajsik ne Mawaltijtuk ken weypalej ipal muchi ne yek tay muchijtuk iwan se tawipanti mas wey wan mas yek, ne inte kichijtiwit ne ijimey aka, ne kineki ina ka inte ipal muchi ini tay muchijtuk, ¹² intesu kalwikak iesyu cabrajmet wan wakashmet pal kalaki ijtik ne Teupan asunte iesyu yajasan, kwak tamik kiajsi tamakishtilis pal senpa; ¹³ ika asu ne iesyu cabrajmet wan tujturuj wan ineshyu wajwakashkunet shinijtuk ijpak ne tay mususulwijtuk tateuchiwa pal tikpupuat ne tunakayu, ¹⁴ keski mas ne iesyu ne Mawaltijtuk, ká inte kipiatuya nian se ipelech wan mutakulij ipal ne Teut ipanpa se iijiu inte miki, yawi kipupua ne tutasenmatilis pal tikajkawat tutejtekiw ne inte yujyultuk, pal titekitit ipal ne Teut yultuk!

¹⁵ Wan yajika yaja tajkutaketzani ipal se yankwik sentaketzat pal kiane, ken mikik pal kinmakishtia ne tateyekchijtiwit itan ne achtu sentaketzat, ne munutztiwit yawit kikwit ne tay muchijki prometer. ¹⁶ Ika kan se kiajkawa se testamentoj, muneki ma miki ne ká kiajkawa, ¹⁷ ika se testamentoj mukejketza yek kwak timiktiwit: ne testamentoj inte weli tatka kwak ne ká kichiwa kenhayuk yultuk. ¹⁸ Neka inte muyankwilijtuk ne achtu asunte iwan esti, ¹⁹ ika kwak Moshe tamik kilwia muchi ne techan muchi ne tajtatuktilis ken ina ne tajtuli, kikwij ne iesyu ne wajwakash wan ne cajcabraj iwan at wan chiltik ichkat wan se majtzal, ²⁰ wan inak: "Ini ne esti ipal ne sentaketzat ne metzintuktij ne Teut." ²¹ Yaja nusan kishinij ne esti ijpak ne tawipanti wan muchi ne tajtaiwan ipal ne tekitilis kenhaya, ²² wan ajatzika muchi mupupua iwan esti ken ina ne tajtuli, wan te nemi tetapupulwilis asu inte mushinia esti.

²³ Yajika munekik ma mupupukan muchi ne tay ken tay nemi tik ne ilwikak, wan ne tay ipal ne ilwikak iwan tejtetakulis mas yejyek. ²⁴ Ne Mawaltijtuk inte kalaktuk ijtik ne teupan ne kichijtiwit ne ijimey sejse tay ken tay nemi tik ne ilwikak wan yekkaya, asunte kalaktuk ijtik ne ilwikak pal muneshtia ashkan tik itachialis ne Teut ka tumaku: ²⁵ intesu ma muishpanu yajasan seujseujti ken ne weypalej ne kalaki tik ne teupan muchi ne shijshiwit iwan iesyu sejseuk; ²⁶ kwakuni nemiskia pal yaja pewa taekua kwak pejki ne taltikpak wan hasta ashkan. Sema seujti muneshtijtuk ashkan kwak tami yawi ne taltikpak pal muelkawa ne tay muchijtuk tay teyek. ²⁷ Wan kenha ken nemi pal mikit seujti ne takamet, wan tipan yawi muchiwa juzgar, ²⁸ ne Mawaltijtuk nusan ijkiuni, seujti mutemakak pal kiwika ne tajtateyekchijtuk. Tipan yawi muita senpa kwak inte kipia tajtateyekchijtuk pal mumakishtiat ne kichiat.