Fo Da Hebrew Peopo 4

Hawai‘i Pidgin

4 So den, God wen make one promise, dat he get one place dat he like give us fo “go rest inside.” An dat promise still stay solid. So den, watch out dat some a you guys no mess up, an den you guys no goin get da kine rest God wen promise you guys. ² Now, we wen hear da Good Stuff From God jalike our ancesta guys. Dey wen hear da Good Stuff too, but dey neva like believe um. Az why da Good Stuff dey wen hear neva help dem. ³ Now us guys dat trus God, jalike we “go inside Godʼs place an rest wit him.” But God wen say befo time bout our ancesta guys:

You know, long time ago, wen God wen make da world, he wen pau do everyting he goin do inside da world. An still yet, cuz dem guys neva trus him, he neva let um go inside da land. ⁴ Get one place inside da Bible dat talk bout Day Numba Seven lidis: “Day Numba Seven, az da day God wen rest, afta he wen pau make everyting.” ⁵ An in one nodda place inside da Bible, God wen say dis: “No way dem guys goin eva go inside da land I like give dem fo rest!”

⁶ So, still yet, get peopo dat “goin go inside da place God like give dem fo rest.” Da peopo dat wen hear da Good Kine Stuff From God befo time, dey neva go inside dea, cuz dey neva like trus God. ⁷ One mo time, God make spesho one nodda day fo dem. Cuz long time afta our ancesta guys neva like trus God, David wen write down inside da Bible wat God wen say, da same kine tings I jus wen tell you guys. He wen talk bout one time, an dat time, he call um “Today.” He say:

⁸ David not talking bout da time Joshua wen take da peopo inside da land, you know. Cuz if Joshua wen give dem rest, den God no need fo talk bumbye bout one nodda kine day fo get rest. ⁹ So den, dat mean, get one rest day fo Godʼs peopo still yet, jalike Day Numba Seven, dat time God wen rest.

¹⁰ So, wen God give you his kine rest, take um. Dat mean time fo rest, an you pau do yoa work awready, jalike God wen rest, afta he wen pau do his work.

¹¹ So den, good us guys really like get dat kine rest, so dat nobody mess up cuz dey no trus God, jalike da peopo dat wen mess up befo time. ¹² Cuz you know, da Stuff God tell us guys get plenny power, an get life. Wat God say goin go inside us mo betta den one sword dat get two side sharp. Goin check out wat we stay tinking, an wat stay inside our heart, an how come we stay doing da kine stuffs we do. Dass jalike one sharp sword dat can open da joints an da bone marrow stuff. ¹³ Everyting God wen make, he can see. No mo notting dat can hide so dat he no can see um. Cuz everyting stay open fo him check um out. An God, he da One we gotta tell why we wen do da tings we wen do.

Jesus Da Bestes Kine Head Priest Guy

¹⁴ Kay den. Now us guys, we get Jesus. He Godʼs Own Boy, an he da bestes kine Head Priest guy. He wen go all da way up inside da sky wea God stay awready! So, all us guys dat say we trus Jesus, we gotta hang in dea an no give up fo trus him. ¹⁵ Our Head Priest Guy, Jesus, he undastan how us guys not strong an no can handle da bad kine stuff. Cuz he wen get presha fo do all kine bad stuffs jalike us guys. But he neva. ¹⁶ So den, no need be scared. Us guys gotta make strong fo go in front Godʼs throne, cuz he like do plenny good kine stuff fo help us. He goin give us chance, an wen we need help, he goin give um.