Canchis yachacujcunamanmi Jesusca ricurishca

21 Chai q'uipapish Tiberias cucha c'uchupimi Jesusca, cutin paipaj yachacujcunaman ricurirca. Chaipica cashnami tucurca: ² Simón Pedro, ishqui huacharishca Tomás, Galileapi caj Caná pueblomanta Natanael, Zebedeopaj churicuna, shujtaj ishqui yachacujcunandijmi tandalla carcacuna.

³ Chaipimi, Simón Pedroca:

–Ñucaca chalhuata japinamanmi rigrini– nijpi caishujcunapish:

–Ñucanchijpish canhuan rishun– nishpami, barcopi yaicushpa chalhuanaman rircacuna. Ashtahuanpish chai tutaca, imata mana japircacunachu.

⁴ Ñalla achijyamucujpimi Jesusca, ñapish chai cucha uripi ricurirca. Ashtahuanpish yachacujcunaca, Jesús cashcataca mana rijsircacunachu.

⁵ Chaimantami paicunataca:

–Huahuacuna, ¿imallatapish micunapaj charinguichijchu?– nijpi paicunaca:

–¡Imata mana charinchijchu!– nircacuna.

⁶ Shina nijpi, Jesusca:

–Barcomanta alli maquinijman linchita shitaichij, japinguichijllami– nircami.

Chashna nijpi shitashpaca, achca chalhuacuna jundajpi linchitaca, mana llujshichi tucurcacunachu. ⁷ Chaimantami Jesús c'uyashca yachacujca, Pedrotaca: «¡Apunchij Jesusmari!» nirca.

«Apunchij Jesusmari» nijta uyashpaca Simón Pedroca, churanata churarishpa chumbillirishcahuan, yacuman huashicurcallami. Chaicamaca churanata llujshichishcami puricurca. ⁸ Caishuj yachacujcunaca, linchi junda chalhuata aisashpami, barcopi shamurcacuna. Allpaman chayanapajca, iscun chunga metro shinallami illarca. ⁹ Barcomanta allpaman uriyashpaca, yanta rupacuj nina jahuapi shuj chalhua cusaricujtapish, tandatapishmi ricurcacuna.

¹⁰ Jesusca:

–Cunan cancuna japishca asha chalhuacunata apamuichij– nircami.

¹¹ Simón Pedroca barcoman huichiyashpami, patsaj pichca chunga quimsa jatun chalhuacunahuan junda linchita allpaman llujshichirca. Chashna achca chalhuacunahuan junda cashpapish, linchica, mana lliquirircachu. ¹² Jesusca:

–Shamuichij, micunguichij– nircami.

Shina nijpipish Paitaca, Apunchij Jesús cashcata yachashpami, maijan yachacujpish: «¿Canca pitaj canguiari?» nishpallapish mana tapurca. ¹³ Jesusca c'uchuyashpami, tandata japishpa paicunaman cararca. Chalhuatapish cararcami. ¹⁴ Jesusca huañushcacunapaj chaupimanta causarishca q'uipaca, caihuanca ñami quimsa cutin Paipaj yachacujcunaman ricurirca

Pedrotami Jesusca ‘Ñuca ovejacunata michicungui’ nishca

¹⁵ Ña micushca q'uipami Jesusca, Simón Pedrotaca:

–Jonaspaj churi Simón, ¿canca caicuna c'uyashcatapish yallichu c'uyahuangui?– nishpa tapurca.

Chashna nijpica:

–Ari Apu, ñuca Canta c'uyajtaca, Canllataj yachanguimi– nircami.

Chashna nijpi:

–Ñuca malta ovejacunaman caracungui– nircami.

¹⁶ Jesusca caihuanca, ishqui cutinmi:

–Jonaspaj churi Simón, ¿Ñucataca c'uyanguitajchu?– nijpi, Pedroca:

–Ari Apu, ñuca Canta c'uyajtaca canllataj yachanguimi– nircami.

Chashna nijpica:

–Ñuca ovejacunata michicungui– nircami.

¹⁷ Jesusca caihuanca, quimsa cutinmi Pedrotaca:

–Jonaspaj churi Simón, ¿Ñucataca c'uyanguitajchu?– nirca.

Caihuanca ña quimsa cutin: «¿Ñucataca c'uyanguichu?» nishcamanta llaquirishpami, Pedroca:

–Apu, Canca tucuitamari yachangui. Ñuca Canta c'uyajtaca, Canllataj yachanguimari– nircami.

Chashna nijpi, Jesusca cashnami nirca:

–Ñuca ovejacunata michicungui. ¹⁸ Can chairaj cashpaca, canllataj chumbilliringuillami. Maiman risha nishpapish ringuillami. Ashtahuanpish yuyajyajpica, cambaj rigracunamantami aisangacuna. Chumbillinatapish shujtajmi chumbillichinga, can mana risha nishcamanmi pushangacuna, chashnatajmi canga– nircami.

¹⁹ Chashna nishpaca Jesusca, Pedro ima shina huañushpa, Taita Dios jatun cashcata ricuchina cashcatami huillarca. Chashna nishca q'uipami Jesusca, Pedrotaca:

–Ñucata catilla– nirca.

²⁰ Pedro tigralla ricushpaca, Jesuspaj c'uyashca yachacuj caticujtami ricurca. Chai yachacujca Jesús huañuna ñaupa, paicunahuan chishi micucujpi Paipi huancarishpa: «Apunchij Jesús, Cantaca, ¿pitaj japichigrin?» nishpa tapujllatajmi carca. ²¹ Pedroca paita ricushpami, Jesustaca:

–Apu, cutin paica, ¿imataj tucunga?– nirca.

²² Shina nijpi, Jesusca:

–Ñuca munajpica paica Ñuca tigramungacama causacuchunpish, canca, ¿imatataj nisha ningui? Canca Ñucata catilla– nircami.

²³ Jesús chashna nishcatami, crijcunapurapica, “Chai yachacujca mana huañungachu” nishpa huashan parlanacurcacuna. ‘Mana huañungachu’ nishpaca, Jesusca mana nircachu, ashtahuanpish: «Ñuca munajpica paica Ñuca tigramungacama causacuchunpish, canca, ¿imatataj nisha ningui? Canca Ñucata catilla» nircallami.

²⁴ Cai yachacujllatajmi tucui caicunataca huillan, paillatajmi caicunataca quillcarca. Paica chashnataj tucushcata ricushpami huillarca.

²⁵ Jesusca shujtaj achca allicunatami rurarca. Chai tucuita, callarishpa quillcasha nijpica, cai pachapica librocunata maipi churangapajca, mana pajtanmanchu yuyanimi. Chashna cachun.