Juan 19

Mushuj Testamento Diospaj Shimi

Jesustaca ‘Huañunatajmi can’ nishcacunami

19 Chashna nijpimi, Pilatoca Jesusta japishcahuan azotichirca. ² Soldadocunaca, casha coronata rurashpami, Paipaj umapi churachircacuna. Jahua churanatapish amsa puca churanatami, churachircacuna.

³ Chaimantaca:

–¡Cushicui, judiocunata Jatun Mandaj!– nij tucushpami, quijadospi huajtarcacuna.

⁴ Pilatoca, cutin canllaman llujshishpaca:

–Riquichij, Pai ima millaita rurashcata mana japinichu, cancunamanpish chaita huillangapajmi cutin canllaman pushamuni– nircami.

⁵ Jesusca casha coronata, amsa puca jahua churanatapish churashcami llujshirca. Ña llujshijpimi Pilatoca:

–¡Cai runaca caipimi!– nirca.

⁶ Jesusta ricushpacarin pushaj curacunapish, chapajcunapish:

–¡Chacatailla! ¡Chacatailla!– nishpami caparircacuna.

Shina nijpimi Pilatoca:

–Cancunallataj pushashpa chacataichijlla. Ñucaca, ima millaita rurashcata mana japinichu– nircami.

⁷ Chashna nijpi judiocunaca:

–Ñucanchijca shuj Mandashcatami charinchij. Paica, “Diospaj Churimi cani” nishcamantaca, chai Mandashcapi nishca shina huañunatajmi can– nircacunami.

⁸ Chashna nijta uyashpacarin, Pilatoca ashtahuanmi mancharca. ⁹ Mandashpa tiyana ucuman cutin yaicushpami, Jesustaca:

–Canca, ¿maimantataj cangui?– nijpi, Jesusca, mana imata cutichircachu.

¹⁰ Chaimantami Pilatoca:

–¿Ñucahuanchu mana rimangui, imamí? Ñucaca, Canta chacatachun mandai tucushcatapish, cacharichun mandai tucushcatapish, ¿manachu yachangui?– nircami.

¹¹ Shina nijpi, Jesusca:

–Mandai tucunata jahua pachamanta canman mana cushca cajpica, Ñucataca imata mana ni tucunguimanchu. Chaimanta, Ñucata cambaj maquipi churajmi, canta yalli mana allita rurashca– nircami.

¹² Chashna nishcamantapachami Pilatoca, ima shinapish cacharinata yuyacurca. Ashtahuanpish judiocunaca:

–Caita cacharishpatajca, ña mana Cesarhuan apanacuj canguichu. Pipish jatun mandaj tucusha nijca, Cesartami c'ariyacun– nishpami caparircacuna.

¹³ Chaita uyashpaca Pilatoca, Jesusta canllaman llujshichichun mandashpami, juchachishcacunata tapungapaj tiyarinapi tiyarirca. Chai ucuca, hebreo rimaipica, Gabatá shutimi. Chaica ‘rumihuan churashca pamba’ nisha ninmi. ¹⁴ Chai punllaca, Pascuapaj allichirina punllami carca, ñami chaupi punllayamucurca. Chai tutamantami Pilatoca, judiocunataca:

–¡Riquichij, cancunapaj jatun Mandajca caipimi!– nirca.

¹⁵ Ashtahuanpish paicunaca:

–¡Llujshichi! ¡Llujshichi! ¡Chacatailla!– nishpami caparircacuna.

Chaimantami Pilatoca:

–¿Cancunapaj jatun Mandajtachu chacatachun ninguichij?– nijpi, pushaj curacunaca:

–¡Cesarllami ñucanchij jatun mandaj, pi shujtaj jatun mandajtaca mana charinchijchu!– nircacunami.

¹⁶ Shina nijpi Pilatoca, chacatagrichun paicunaman curcallami. Chaimantami Jesustaca, ña pushashpa rircallacuna.

Jesustaca chacatashpami huañuchishcacuna

¹⁷ Jesusca Paita chacatana cruzta aparishpami, Uma Tullu shuti urcuman huichiyarca. Chai urcuca, hebreo rimaipica Gólgota shutimi. ¹⁸ Chaipimi ishqui runacunandij, Jesustaca chaupipi churashpa chacatarcacuna.

¹⁹ Pilatoca: «NAZARETMANTA JESUSCA JUDIOCUNATA JATUN MANDAJMI» nishca quillcatami, cruz jahuapi churachirca. ²⁰ Jerusalén c'uchullapi Jesusta chacatashca cajpimi, chai quillcataca achca judiocuna ricurca. Chai quillcaca hebreo, griego, latín rimaicunapimi carca. ²¹ Chashnata ricushpaca, judiocunata pushaj curacunami Pilatotaca:

–“Judiocunapaj Jatun Mandajmi” nishpaca, mana quillcachinachu carcangui, ashtahuanpish: “ ‘Ñucaca, judiocunapaj Jatun Mandajmi cani’ nircami” nishcatamari quillcachina carcangui– nircacunami.

²² Chashna nijpi Pilatoca:

–Ñuca ña quillcashcaca, chashnami saquiringa– nircami.

²³ Soldadocunaca, Jesusta ña chacatashpaca, Paipaj churanacunata japishpami chuscu soldadocuna shuj shuj chaupinacurcacuna. Ucu churanatapishmi japircacuna. Chaica mana sirashca, jahuamanta ucucama tucui ahuashcallami carca.

²⁴ Chashna cajpimi, paicunapura:

–Caitaca ama chaupishunchijchu. Maijanpajpish urmachun suerteta rurashunchij– ninacurcacuna.

Chashna rurajpimi:

nishpa quillcashcaca, pajtarca. Soldadocunaca chashnatajmi rurarcacuna.

²⁵ Jesusta chacatashca c'uchupica, Jesuspaj mama ñañandij, Cleofaspaj huarmi Mariapish, Magdalamanta Mariapishmi carca. ²⁶ Jesusca paipaj mamapish, Pai c'uyashca yachacujpish chaipi cajta ricushpami, mamataca:

–Mama, cunanca paimi cambaj churi– nirca.

²⁷ Chai q'uipaca, yachacujtapish:

–Cunanca, paica cambaj mamami– nircami.

Chaipachamantami chai yachacujca, Mariataca paipaj huasipi causachun pusharca.

Jesusca manaraj tullucunata p'aquijpimi huañushca

²⁸ Chai q'uipami, ña tucuita tucuchishcata yachashpaca, Dios Quillcachishcapi nishca pajtachun Jesusca:

–¡Yacunanca!– nirca.

²⁹ Chaipica, vinagrehuan junda shuj mangami tiyacurca. Soldadocunaca esponjata chaipi satishpa, hisopo caspi puntapi churashpami, Jesuspaj shimiman pajtachirca. ³⁰ Chai vinagreta mallishpaca, Jesusca:

–Ña tucui pajtachishcami– nircami.

Chashna nishcahuan uma huarcurishpa, Paipaj espirituta Diosman mingarcallami.

³¹ Judiocunaca, Pascua callarina sábado punllapajmi allichirina caraca. Chai jatun punllapajca, huañushcacunataca mana cruzpi saquinachu carca. Chaimantami changacunata p'aquishpa, chaimanta anchuchichichun, Pilatota mañagrircacuna. ³² Chaimantami soldadocuna shamushpaca, Jesushuan chacatashca runacunataca chayanllapi cajtaraj, changacunata p'aquirca. Chaipaj q'uipaca, caishujpajtapishmi changacunata p'aquircacuna. ³³ Jesuspajman c'uchuyashpaca, ña huañushcata ricushpa, Paipaj changacunataca mana p'aquircacunachu. ³⁴ Ashtahuanpish shuj soldado, costillas quinripi lanzahuan tujsijpimi, yahuarhuan, yacuhuan llujshishpa tallirirca. ³⁵ Caitaca, chashna tucujta quiquin ñahuihuantaj ricujmi, huillashca. Chashnataj tucushcatami huillashca. Cancunapish uyashpa crichunmi, chashnataj cashcata huillashca. ³⁶ Dios Quillcachishcapi: «Paipaj tulluca shujllapish mana p'aquishcachu canga» nishca pajtachunmi chashnaca tucurca. ³⁷ Shinallataj shujtaj Quillcapipish: «Paicuna chugrichishcallatatajmi ricungacuna» nishpami huillacun.

Jesustaca mushuj jutcupimi churashcacuna

³⁸ Chai tucui tucushca q'uipami, Arimateamanta Joseca, Jesús huañushcata apangapaj Pilatota mañagrirca. Paica judiocunata manchashcamantami, huashalla Jesuspaj yachacuj carca. Pilato apachunlla nijpica, Jesús huañushcataca aparcallami. ³⁹ Ñaupaman Jesuspajman tuta shamuj Nicodemopish, mishquijlla ashnajta patsaj libra shinata apashcami shamurca. Chaica mirrahuan, aloehuan chagrushpa rurashcami carca. ⁴⁰ Paicunami Jesús huañushcata apashpa, mishquijlla ashnacujhuan churashpa linsocunahuan pillurcacuna. Judiocunaca, ñaupamantami chashna pambajcuna cashca. ⁴¹ Chai chacatashca c'uchullapitajmi, shuj huerta tiyarca. Chai huertapica, pi huañushcata manaraj churashca, mushuj jutcumi tiyarca. ⁴² Judiocuna Pascuapaj allichirina punllaca, ñallami tucurigrirca. Chai jutcupish c'uchullapi cajpimi, Jesús huañushcataca, chaipi churarcacuna.