Kollossa 3

Reimer 2001

3 Wan jie nu dan met Christus oppjestone sent, dan seakjt daut waut bowe es, wua Christus to Gott siene rajchte Haunt sete deit.

² Sat june Jedanke opp daut waut bowe es, nich opp dee Dinje dee oppe Ead sent.

³ Dan jie sent jestorwe, en jun laewe es met Christus enn Gott fewoat.

⁴ Wan Christus, dee nu onns Laewe es, jeoppenboat woat woare, dan woa jie met am toop jeoppenboat woare enn Harlichkjeit.

⁵ Doaromm raeakjent june Jliede hia oppe Ead aus Doot: soo aus Huararie, Onnreinichkjeit, Leidenschooft, beeset Felange, en Jiets - dann daut es Jetsedeenst;

⁶ dan waeajen soone Dinje kjemt Gott sien Oaja.

⁷ Doarenn waundeld jie uk don aus jie enn soont laewde.

⁸ Oba nu lajcht uk aul soone Dinje auf: Oaja, Wutt, Grollet, Lastre; lot kjeene schentliche Wead ut jun Mul kome;

⁹ doot nich eena tom aundra leaje, wiel jie ha dee oola Natua aufjelajcht met dee oole Woakje,

¹⁰ en trakjt daen nieha Natua aun, dee nie jemoakt woat derch ne folle Erkjantnes no daem sien Bilt dee daen erschaufe haft,

¹¹ wua doa kjeen Jrieche oda Jud es, kjeen Beschnaedna oda Onnbeschnaedna, Barbora, Tsietsen, Sklow oda Frie, oba wua Christus aules en enn aules es.

¹² Doaromm, aus Gott siene Uterwaelte, en heilich en jeleeft, kjleet junt met deepet Erboarme, Frintlichkjeit, Deemuet, Saunftmoot, Jedult enn Fefoljinj,

¹³ fedroagt eena daem aundra, en fejaeft junt unjarenaunda wan irjentwaea ne Kloag haft jaeajen irjent waem; soo aus de Herr junt fejaeft haft, soo doot jie uk.

¹⁴ En aewa aul dise Dinje hat Leew, dan daut eset daut aules toopbinjt.

¹⁵ En lot Christus siene Fraed enn june Hoate rejeare, dan doato sent jie beroope enn een Lief, en siet dankboa.

¹⁶ Lot Christus sien Wuat rikjlich enn junt wone enn aule Weisheit, en beleat en femont junt unjarenaunda met Psalme, en jeistlichet Jesank, en singt met Jnod enn june Hoate to Gott;

¹⁷ en wautemma jie doone, auf enn Wuat oda Woakj, doot enn daem Herr Jesus sien Nome, en dankt Gott daem Foda derch am.

¹⁸ Fruhes, siet june Mana unjadon, soo auset emm Herr schekjlich es.

¹⁹ Jie Mana, hat june Fruhes leef, en siet nich betta jaeajen an.

²⁰ Kjinja, jehorcht june Elre enn aules, dan daut jefelt daem Herr seeha.

²¹ Fodasch, doot june Kjinja nich ennoajre, daut see nich mootloos woare.

²² Sklowe, jehorcht june irdische Herre enn aule Sache, nich bloos wan see aeare Uage opp junt ha, oba met en eenselnet Hoat enn Gottesforcht.

²³ Wautemma je doone, doot fonn Hoate oabeide soo aus daem Herr to deene, en nich Mensche,

²⁴ dan jie weete daut jie fonn daem Herr daen Oawgootsloon kjriehe woare; dan jie deene daem Herr Christus.

²⁵ Oba waea Onnrajcht deit, woat daut kjriehe waut hee Onnrajcht jedone haft, en doa es kjeen Aunseene de Persoon.