Jesustaca Pilatopaj maquipimi churashcacuna

23 Chai q'uipa tucuicuna cutin huaicashpa jatarishpami, Jesustaca Pilatopajman pushashpa rircacuna. ² Paipaj ñaupajpimi Jesustaca, cashna juchachircacuna:

–Cai runaca, ñucanchij llajta runacunata crichishpa, mana allita rurachishpami purin. Paica: ‘Cristo tucushpa, Jatun Mandajmi cani’ nishpami, Cesarman cuna cashca impuestotapish ama cuchun mandan– nircacunami.

³ Chashna nijpimi Pilatoca, Jesustaca:

–¿Canca judiocunata Jatun Mandajchu cangui?– nijpi, Jesusca:

–Ari, can nishcallatajmi cani– nircami.

⁴ Shina nijpi Pilatoca pushaj curacunatapish, chaipi tucui cajcunatapish:

–Cai runapica, ima mana allita rurashcata mana japinichu– nircami.

⁵ Chashna nijpipish, tucui chaipi cajcunami caparishpa:

–Galileamanta callarishpa caicamamari, tucui Judea llajtapi causajcunata crichishpa, mana allita rurachishpa purin– nircacuna.

⁶ ‘Galilea’ nijta Pilato uyashpaca:

–Shinashpaca, ¿cai runaca Galileamantachu?– nishpami tapurca.

⁷ Chashna tapujpica:

–Ari, Galileamantami– nijpi, Galileata mandaj Herodespajmanmi cacharca.

Chai punllacunapica, Herodespish Jerusalenllapitajmi carca. ⁸ Herodesca, paipajman pushajpi Jesusta ricushpaca, achcatami cushicurca. Herodesca, ñaupamanmi Jesús achca milagrocunata ruraj cashcata uyarca. Chaimantami, Pai ima señalta rurajta ricusha nicurca. ⁹ Herodesca Jesustaca, achcatami caita chaita tapurca. Chashna tapujpipish, Jesusca imata mana nircachu. ¹⁰ Pushaj curacunapish, Mandashcata yachachijcunapish chaillapitajmi carca. Paicunaca, Jesustaca caita chaita nishpa, achcatami juchachircacuna. ¹¹ Chai q'uipami Herodespish, paipaj soldadocunapish Jesustaca p'iñashpa pugllarcacuna. Churanatapish, jatun mandajman shinami alli, sumaj churanata churachij tucurcacuna. Chashna rurashpaca, cutinllatajmi Pilatopajman tigrachishpa cacharca. ¹² Chai punllami Pilatoca, Herodeshuan alli tucunacurca. Ñaupamanca p'iñanacushcami carca.

¹³ Paipajman cachajpimi, Pilatoca pushaj curacunatapish, llajtata mandajcunatapish, tucui chaipi cajcunatapish tandachirca. ¹⁴ Paicuna tandanacujpimi, Pilatoca cashna nirca:

–Cancunami cai runataca ‘Shujtajcunata crichishpa, mana allita rurachicun’ nishpa pushamushcanguichij. Cai runataca, cancunapaj ñaupajpimi ña tapurcani. Cancuna juchachicushca shina, ima mana allitaca mana japinichu. ¹⁵ Cancuna nijpi Herodespajman cachajpi, paipish ima mana allita mana japishcachu. Chaica riquichij, cai runaca huañuchishca canapaj shina ima mana allitaca mana rurashcachu. ¹⁶ Paitaca macachishpa cacharishalla– nircami.

¹⁷ Pilatoca Pascua punllapica, preźucunamanta shujta cacharij cashcamantami, maijantapish cacharina carca. ¹⁸ Ashtahuanpish chai tandanacushca gentecunaca:

–¡Paitaca huañuchilla! ¡Barrabastami cacharichun ninchij!– nishpami caparircacuna.

¹⁹ Barrabastaca, chai pueblopi macanacungapaj jatarichishcamantapish, huañuchij cashcamantapishmi carcelpi tiyacurca. ²⁰ Pilatoca, Jesusta cacharisha nishpami cutin tapurca. ²¹ Cutin tapujpipish, tucuicunami:

–¡Chacatailla, chacatailla!– nishpa, ashtahuan caparircacuna.

²² Chashna caparicujpipish Pilatoca, caihuanca quimsa cutinmi cashna nirca:

–Paita huañuchingapajca, ¿ima mana allitataj rurashcari? Ima mana allita mana japinica. Paitaca, macachishpa cacharishalla– nircami.

²³ Chashna nijpipish:

–¡Chacatashpa huañuchilla!– nishpami, ashtahuan caparircacuna.

Pushaj curacunaca, chashna achcata caparishpami, paicuna nishcata rurachircacuna. ²⁴ Pilatoca, paicuna nishcata caźushpami, Jesustaca ‘Huañunami cangui’ nishpa mana cacharirca. ²⁵ Chai pueblopi macanacungapaj jatarichishcamantapish, huañuchishcamantapish preźu tiyacuj runata cacharichun paicuna mañashcatami cacharirca. Ashtahuanpish Jesustaca, paicuna munashcata rurashpami, paicunapaj maquipi churarca.

Jesustaca Golgotapimi chacatashcacuna

²⁶ Jesusta ña chacatanaman pushacushpaca, Cirene pueblomanta Simón shuti shuj runatami chagramanta shamucujta japircacuna. Paimanmi, Jesusta chacatana cruzta apachishpa, Jesuspaj cati pushashpa rircacuna.

²⁷ Achca gentecunapishmi caticurca. Achca huarmicunapish Jesusta llaquishpa, caparirishpa huacashpami caticurcacuna. ²⁸ Jesusca, chai huacacuj huarmicunata tigralla ricushpami cashna nirca:

–Jerusalén huarmicunalla, ama Ñucamanta huacaichijchu. Cancuna quiquinmanta, cancunapaj huahuacunamanta huacaichij. ²⁹ ‘Mana huachaj, mana chichuj, mana chuchuchij huarmicunaca cushicuichij’ nina punllacuna chayamungamari. ³⁰ Chai punllacunapica, huañusha nishpa:

“Urcucuna llapihuaiari, lomacuna pacahuaiari” ningacunami. ³¹ Verde yurata cashna rurashpaca, chaquishca yuratacarin, ¿imatapishchari rurangacuna?– nircami.

³² Jesusdij chacatashpa huañuchingapajca, huañuchij ishqui runacunatapishmi pushashpa rircacuna. ³³ Uma Tullu sirina shuti urcuman ña chayashpami, Jesustaca chaipi chacatarcacuna. Shinallataj huañuchij runacunatami, shujtaca Paipaj alli ladoman, caishujtaca lluqui ladoman chacatarcacuna. ³⁴ Cruzpimi Jesusca:

–Ñuca Yayalla, Ñucata p'iñajcunataca perdonailla. Paicunaca, imata ruracushcata mana yachancunachu– nirca.

Cutin soldadocunaca, Jesuspaj churanataca, suerteta rurashpami chaupinacurcacuna. ³⁵ Tucui chaipi cajcunami, Jesustaca chaparacurcacuna. Mandajcunapish asishpami, cashna nircacuna:

–Paica, shujtajcunataca quishpichijmari carca. Taita Dios cachashca Cristotaj cashpaca, cunan paillataj quishpirichunri– nircacunami.

³⁶ Soldadocunapish Jesustaca pugllashpami, vinagreta ubyachishun nishpa asircacuna. ³⁷ Chashna rurashpaca:

–Judiocunata Jatun Mandaj cashpaca, Canllataj quishpiriari– nircacunami.

³⁸ Jesusta chacatashca uma jahuanijpica griego, latín, hebreo rimaicunapimi: “CAICA JUDIOCUNAPAJ JATUN MANDAJMI” nishpa quillcashcata churarcacuna.

³⁹ Chacatashca shuj huañuchij runaca, Jesustaca:

–Can Cristo cashpaca, Canllatajpish quishpiri, ñucanchijtapish quishpichiari– nishpami c'ami callarirca.

⁴⁰ Chashna rimacujpimi, caishuj huañuchij runaca cashna nirca:

–Canpish chacatashcallataj huañucushpapish, ¿manachu Diostaca manchangui, imatagari? ⁴¹ Ñucanchijca millaita rurashcamantami, cai llaquitaca apacunchij. Ashtahuanpish cai runaca, ima mana allita mana rurashcachu– nircami.

⁴² Shina nishpa chai runaca, Jesustaca:

–Can mandaj shamushpaca, ñucata yuyaripangui– nircami.

⁴³ Chashna nijpi Jesusca:

–Cunanllatajmi Ñucahuan Paraisopi cangui, chashnatajmi canga– nircami.

Jesusca chaupi chishitami huañushca

⁴⁴ Ña chaupi punlla shinamantami, chaupi chishicama tucui cai pacha tutayarca. ⁴⁵ Intipish mana achijyachircachu. Diospaj huasi ucupi jarcachishca jatun linsopish, chaupitami chaquiyajta uriman lliquirirca. ⁴⁶ Chashna tucushca q'uipami, Jesusca:

–Yayito, Cambaj maquipimi Ñuca espiritutaca mingani– nishpa, sinchita caparirca.

Chashna nishpaca, huañurcallami.

⁴⁷ Patsaj soldadocunata mandaj chaita ricushpaca, Taita Diosta sumajyachishpa:

–Cai runaca, cashcata ruraj runatajmari cashca– nircami.

⁴⁸ Tucui chaipi cajcunapish, chai tucuita ricushpaca, mancharishpa, shungupi huajtarishpami tigramurcacuna. ⁴⁹ Ashtahuanpish Jesuspaj tucui rijsishcacunahuan, Galilea llajtamanta Jesusta catishpa shamuj huarmicunaca, carullamantami chai tucuita ricushpa shayacurcacuna.

Arimatea pueblomanta Josemi Jesusta pambashca

⁵⁰ Cashcata ruraj, José shuti shuj runami tiyarca. Paica, tandanacushca mandajcunapuramantami carca. ⁵¹ Paipish, Taita Dios mandachun shuyacushcamantami, caishuj mandajcuna ima shinalla yuyarinacushpa, Jesusta chashna rurashcahuanpish mana shujlla yuyai carca. ⁵² Chaimantami Pilatopajman rishpa, Jesuspaj aichata pambangapaj mañarca. ⁵³ Chacatashcamanta uricuchishpaca linsohuan pillushpami, rumi quinripi jutcuchishca ucupi churarca. Chai jutcuca, pita manaraj churashcami carca. ⁵⁴ Sábado punlla ña callarigrijpimi, Pascuapaj allichina carca.

⁵⁵ Galilea llajtamanta Jesusta catishpa shamuj huarmicunapish Joseta catishpa rishpami, jutcupi Jesusta ima shina churajtaca ricurcacuna. ⁵⁶ Chai huarmicunaca ña huasiman tigramushpaca, sumaj mishquiman ashnacujcunatapish, llihuina jambicunatapishmi Jesuspaj cuerpopi churangapaj allichircacuna. Chai q'uipaca, ña sábado punlla callarijpimi, mandashcapi nishca shina samarircacuna.