Lukas 23
Ne Bibliaj Tik Nawat
Ishpan Pilatus wan Herodes
23 Wan muketzket muchi wan kiwikaket itech Pilatus. 2 Pejket kitenewat. Inat:
—Yajini tikajsiket kimajmalia ne tutechan, wan kilwia ma inte kimaka tumin ne taltikpaktuktiani, wan ina ka yajaya ne Mawaltijtuk, ne tatuktiani.
3 Pilatus kitajtanilij:
—Taja tiintatuktiani ne Yudayujmet?
Yaja nankilij:
—Taja tina!
4 Pilatus kinhilwij ne weypalejmet wan ne miaktal:
—Itech ini takat inte nikajsi tatka pal nina ka kichijtuk.
5 Yejemet inaket ka kia, inat:
—Kinmachtia ne Yudayujmet nujme pal kikumuntia ne techan; pejki tik Galilaya wan ajsik hasta nikansan.
6 Kwak Pilatus kinkakik, kitajtan su yaja ipal Galilaya 7 wan kwak kimatki ka nemi itan ne itatuktilis Herodes kititanij itech Herodes, ika yajuni nusan nemituya Yerushalem tik uni tujtunal.
8 Ne Herodes pakik sujsul kwak kitak Yeshu, ika ikman kielewijtuya kita ipanpa muchi tay takakik. Wan kinekituya ma kichiwa se pal muishmati pal yaja kita. 9 Kitajtani katka iwan miak palabraj wan yaja inte nankilij tatka. 10 Kenhayuk ne weypalejmet wan ne tajkwiluanimet kitenewat katka sujsul. 11 Herodes wan ne tasumanimet ne nemituyat iwan inaket ka inte tatka ipatiw, wan pal kipajpakiliat kitalilijket ikwajkwach yektzin, wan kititanijket itech Pilatus. 12 Kwakuni Herodes wan Pilatus mukwepket ajamigoj, melka achtu muijishtuyat ne se wan ne seuk.
13 Kwak Pilatus tamik kalinnutza ne weypalejmet wan ne tatuktianimet wan ne chinamit, 14 kinhilwij:
—Ankalwikatiwit nutech ini takat ken se kimajmalia ne techan, wan naja nikan niktajtanilijtuk anmuishpan wan inte nikajsituk tatka itech ini takat pal nina ka yaja kichijtuk ken ankitenewat, 15 wan Herodes nusan inte, ika yaja kititanij tutech, wan shikita, inte kichijtuk tatka pal tinat ma miki. 16 Yajika niaw nikwiteki wan ma yawi. (17) .
18 Pejket tzajtzajtzit:
—Ini inte, shikchululti mas yek ne Bar-Aba!
19 Yajane se tenejtuk ká kitzaktuyat ipanpa sejse muketztiwit tik ne techan wan ipanpa temiktilis. 20 Pilatus kinnutzki senpa ika kinekituya kichulultia ne Yeshu; 21 yejemet tzajtzit tzajtzit, inat:
—Shikcruzpilu, shikcruzpilu!
22 Uksenpa kinhilwij:
—Taika? Tay kichijtuk ini tay inte yek? Inte nikajsituk tatka pal ma miki. Ma nikwiteki wan ma yawi.
23 Yejemet kenhayuk tzajtzit wan kipitziniat katka pal kitajtanit ma mucruzpilu, wan sujsul miak ijkiuni; 24 wan Pilatus tatuktij ma muchiwa ken kitajtanit. 25 Kichulultij tel ne mutzaktuya ipanpa ne muketztiwit wan ipanpa temiktilis, ken tajtanit, wan kiajkaw ma muchiwa iwan ne Yeshu ken kinekituyat.
Yeshu ijpak ne cruz
26 Kwak kiwikaket nemit, kalkwijket se takat itukay Shimon, se ipal Kurene, ne witz tik ne kojtan, ma kiwika kuteputzwijtuk ne cruz iipan ne Yeshu. 27 Iwan nejnenket miak ipal ne techan wan miak siwat ne chukat katka wan mutajtaweliat. 28 Ne Yeshu muishkwepki pal kinhita wan kinhilwij:
—Sijsiwatket ipal Yerushalem, maka shichukakan nupanpa, shichukakan anmupanpa wan inpanpa ne anmupilawan, 29 ika witzet tujtunal kwak yawit inat: "Suertej kipiat ne inte welit kipiat kukunet wan ne ijijti inte tapunijtiwit wan ne chijchichiwal inte tachichitiwit." 30 Kwakuni yawit pewat kilwiat ne tejtepet "shiwetzikan tujpak!", yawit kilwiat ne tepetzitzin "shitechpachukan!", 31 ika asu kienej kichiwat iwan ne kwawit selek, tay kichiwasket iwan ne waktuk!
32 Nusan muwikat katka uk ume tateyekchiwani pal kinmiktiat iwan, 33 wan kwak ajsiket kan itukay Ne Tzuntekumat, ikuni kincruzpilujket yaja wan ne tateyekchiwanimet, ne se ka iyekkan wan ne seuk ka ukse ladoj. 34 Yeshu inak:
—Nuteku, shikintapupulwi, yejemet inte kimatit tay kichiwat.
Kitakutuntijket ne ikwajkwach; kitamutaket chivos pal kitat ká ipal.
35 Muchi muketzket wan nakaket tachiat. Wan ne tatuktianimet pejket kipakiliat, inat:
—Kinpalewij sejseuk. Ma mupalewi yajasan asu yaja ne Mawaltijtuk, ne ishpejpentuk ipal ne Teut!
36 Ne tasumanimet nusan ajkawetzkaket. Yejemet witzet katka kitakuliat yayushukuk, 37 wan inat katka:
—Asu taja tiintatuktiani ne Yudayujmet, shimupalewi!
38 Nusan nemituya ijkwilujtuk ijpak itzuntekun ijkini: "Ini intatuktiani ne Yudayujmet."
39 Se pal ne tateyekchiwanimet mukupilujtiwit pejki kukujtaketza, ina:
—Taja inte ne Mawaltijtuk? Shimupalewi, wan shitechpalewi!
40 Nankilij ne seuk, kiajwak yajuni wan inak:
—Nian taja timajmawi ipanpa ne Teut, taja ká tinemi kenha? 41 Melka nemi yek ma titashtawikan tejemet ipanpa tay tikchijtiwit, ini te kichijtuk tatka!
42 Wan kilwij Yeshu:
—Shinechelnamiki kwak tiajsi tik mutatekimakalis!
43 Wan kilwij:
—Kia nimetzilwia, tik ini tunal tiaw tinemi nuwan ijtik ne Yekmil.
44 Wan ajsik ne tajkutunal wan kunyuakiski nujme ne tal hasta yey horaj ipal ne teutak. 45 Kwaluk tunal. Tzayanik itajku ne kwachtzakka tik ne teupantzin. 46 Wan ne Yeshu pejki tzajtzi, inak:
—Nuteku, tik mumey nikajkawa nuijiu!
Kwak tamik ina uni, sewik.
47 Kwak ne sentzuntuktiani kitak tay panutuk, inak wey ne Teut wan inak:
—Tejkia ka yek ini takat.
48 Wan muchi ne musentepewtiwit tachiat, kwak tamiket kitat tay panutuk, kitasket inhejelpan wan yajket. 49 Mutalijket wejka wan kitaket muchi uni ne kishmatit Yeshu, wan ne siwatket ipal Galilaya ne iwan senyajtiwit.
Ne shaput
50 Né nemik se takat itukay Yosep, se pal ne kalpuli, se yek takat ne kichiwa sema tay yek. 51 Yajini inte kitztuya yek tay ne taketzket wan kichijket. Yaja se ipal Ramatay tik Yudaya; yaja se tejchia ma wiki ne itatekimakalis ne Teut. 52 Yajini ajsik itech Pilatus pal kitajtani ne mikini, 53 wan kikutemultij wan kikimiluj tik se ikwenyu, wan kitalij tik se shaput tik tet kan inteuk mutekatuk aka. 54 Uni ne tunal ipal tajshitilis kwak yawi pewa ne sewilis.
55 Yajket iipan ne siwatket ne walajtuyat iwan tik Galilaya, wan kitaket ne shaput, wan tachishket ken mutekak ne mikini. 56 Walmukwepket wan kiajshitijket pajtipuputuka. Musewijket tik ne tunal ipal sewilis ken nemi tuktijtuk.
Ne Bibliaj Tik Nawat · © 2008, 2012 Jan Morrow