Mana cuyurij runatami Jesús alliyachishca

2 Tauca punllacuna q'uipami Jesusca, Capernaumman cutinllataj tigrarca. Pai chayajta ricuihuanmi, ‘Ñami huasipi’ nishpa, huashan huillanacurcacuna. ² Chaimantami ñapish, mashnatajshi gentecuna tandanacumurca. Huasi pungucama maipi mana shayaripajta tandanacushpami, Diospaj Shimita Jesús huillashcata uyarcacuna. ³ Chaipi huillacujpimi, mana cuyurijta ruraj ungüi japishca runata, chuscu runacuna huandushpa apamurcacuna. ⁴ Yallitaj gentecuna junda cajpimi, Jesuspajman mana c'uchuyachi tucurcacuna. Chaimantami, huasi c'atata ashata anchuchishpa, chai ungushca runataca Jesuspajman uriyachircacuna. ⁵ Jesusca, paicuna crishcata ricushpami, mana cuyurij runataca:

–Huahua, ñami cambaj juchacunataca anchuchini– nirca.

⁶ Chaipica, Mandashcata yachachijcunamanta maijancunapishmi tiyacurcacuna. Paicunami cashna yuyacurcacuna: ⁷ «¿Ima nishpataj caica chashna ninchu, imamí? Dios tucushpamari, chashnaca nicun. Pipish juchacunataca, mana anchuchi tucunchu, Taita Diosllamari anchuchi tucun» ninacurcacunami.

⁸ Jesusca, paicuna chashna yuyacujta Paipaj espiritupi yachashpami, cashna tapurca:

–¿Ima nishpataj cancunapaj shungupi chashna yuyacunguichij? ⁹ ¿Mana cuyurij runataca: “Cambaj juchacunata anchuchinimi” ninachu, mana cashpaca: “Jatari, huandunata japishpa rilla” ninachu, imata ninataj ashtahuan jahualla? ¹⁰ Runa Aichayuj Ñucataca, cai pachapi juchacunata anchuchi tucuchun cachashcataca, cunanmi ricuchisha– nirca.

Chashna nihuanmi, mana cuyurijta ruraj ungüihuan caj runataca:

¹¹ –Jatari, canta huandumushcata apashpa, cambaj huasiman rilla ninimi– nircami.

¹² Chashna nijpi paica, jatarishcahuan huanduta japishpa, tucuicunapaj ñaupajmanta llujshishpa rircallami. Chaimantami tucuicuna mancharishpa:

–Chashna alliyachijtaca, manataj ricushcanchijchu– nishpa, Taita Diosta sumajyachircacuna.

Jesusca Mateotami ‘Ñucata cati’ nishca

¹³ Chai q'uipami Jesusca, cutinllataj cucha uriman tigrarca. Cutintaj tucui gentecuna Paipajman shamujpimi, yachachij carca. ¹⁴ Chaimanta rishpaca, Alfeopaj churi Levitami, impuestota japinapi tiyacujta ricurca. Paica:

–Ñucata cati– nishpa Jesús cayajpica, jatarishcahuan catishpa rircallami.

¹⁵ Chaimantaca, cashnami tucurca: Jesusca, Levipaj huasipimi micungapaj meźapi tiyacurca. Impuestota japijcunapish, juchayujcunapish achcacunami Jesusdij, yachacujcunandij meźapi tandalla tiyacurcacuna. Paita catij shujtaj achcacunapishmi, paicunahuan carca. ¹⁶ Mandashcata yachachijcunapish, fariseocunapish impuestota japijcunahuan, juchayujcunahuan Jesús micucujta ricushpami, yachacujcunataca:

–¡Riquichigari, caica impuestota japijcunahuan, juchayujcunahuanmari micushpa ubyashpa tiyacun!– nircacuna.

¹⁷ Chaita uyashpami, Jesusca:

–Mana ungushca cajcunaca, mana pi jambijta mashcanchu, ungushcacunallami jambijtaca mashcan. Ñucaca, cashcata rurajcunataca mana cayaj shamurcanichu, ashtahuanpish juchayujcunatami cayaj shamurcani– nircami.

Ayunanamantami tapushcacuna

¹⁸ Bautiźaj Juanpaj yachacujcunapish, fariseocunapaj yachacujcunapishmi ayunaj carca. Chaimantami Jesuspajman shamushpaca, cashna tapurcacuna:

–¿Ima nishpataj Juanpaj yachacujcunapish, fariseocunapaj yachacujcunapish ayunancuna, cutin cambaj yachacujcunaca mana ayunancuna?– nircacunami.

¹⁹ Chashna nijpi Jesusca, cashnami nirca:

–¿Caźarai bodapi cajcunatachari, novio paicunallahuantaj cajpi ayunachun ninguichigari? Novio paicunahuan cajpica, mana ayunai tucunchu. ²⁰ Novio illajlla saquirina punllacuna chayamujpitajcarinpish, ayunangacunami. ²¹ Pipish mauca churanataca, mana mushuj linsohuan llachapanllachu. Mushujhuan llachapajpica, uchillayashpa, mauca churanataca ashtahuan lliquinllami. ²² Shinallataj cunanlla rurashca vinotaca, mauca capachocunapica, pi mana churanchu. Chashna churajpica, cunanlla rurashca vinoca capachocunata tugyachijpi, vinopish tallirinmi, capachocunapish tucurinmi. Chaimanta, cunanlla rurashca vinotaca, mushuj capachocunapimi churana– nircami.

Sabadopipish ima allitaca rurachunlla nishcami

²³ Shuj sabadopimi cashna tucurca: Jesús chagra chaupita ricujpimi, Paipaj yachacujcuna caticushpaca, trigo umata c'utsai callarircacuna. ²⁴ Chaimantami fariseocunaca, Jesustaca:

–Riqui, ¿ima nishpataj sabadopi ama rurachun nishcata rurancuna?– nircacunami.

²⁵ Ashtahuanpish Paica cashnami nirca:

–Davidpish, paihuan cajcunapish, yaricaimanta imata rurashcataca, ¿manatajchu reźashcanguichij? ²⁶ Abiatar, curacunata mandacui punllacunapimi Davidca, Diospaj huasiman yaicushpa, Diosman cushca tandata micurca. Chaitaca, curacunalla micuna tanda cajpipish, paihuan cajcunamanpish carashpami micurca– nircami.

²⁷ Jesusca cashnapishmi nirca:

–Sábado punllataca, runapaj allipaj churashcami, runataca mana sábado punllapaj rurashcachu. ²⁸ Uyaichij, Runa Aichayuj Ñucaca, sabadopipish ima allita rurachunca, mandanimi– nircami.