25 "Dan woat daut Himelsrikj fejlikjt woare met tean Junkfrulied dee aeare Laumpe neeme, en rut jinje daen Briegaum to trafe.

² Nu fief fonn dee weare nich kluak, oba dee aundre fief weare faeasechtich.

³ Dee fief dee nich kluak weare, neeme aeare Laumpe, oba neeme nich Eelj met.

⁴ Oba dee kluake neeme aeare Laumpa, en neeme uk Jefaese met Eelj met.

⁵ Aus dee Briegaum sien kome fetrok, schleepe dee aula enn.

⁶ Med enne Nacht wea doa en Jeschrecht: 'Kjikjt! de Briegaum kjemt! Got am entjaeajen!'

⁷ Donn stunnde dee Junkfruhlied aule opp, en puttste aeare Laumpe.

⁸ Donn saede dee, dee nich kluak weare to dee faeasechtje: 'Jaeft onns fonn june Eelj, dan onnse Laumpe gone ut!'

⁹ Donn saede dee faeasechtje: 'Doa es nich jenuach fa junt uk onns. Got no daen dee Eelj fekjeepe en kjeept fa junt selfst'.

¹⁰ En aus see wajch jinje to kjeepe, kjeem dee Briegaum, en dee, dee reed weare jinje met am enenn no dee Kjast, en de Daea wort toojemoakt.

¹¹ Nohaea kjeeme dee aundre Junkfrulied en saede: 'Herr, Herr, moak op!'

¹² Oba hee auntwuad en saed: 'Enn Woarheit saj ekj junt, ekj kjan junt nich'.

¹³ Doaromm woakt, dan jie weete nich waut fonn Dach oda Stunnd hee kjemt.

¹⁴ Dan daut es soo aus en Maun dee butrem Launt reisd, en roopt siene Sklowe en aewajeef an sien Hab en Goot.

¹⁵ Eenem jeef hee fief Selwastekja, noch eenem twee, en noch eenem eent, doano aus en jieda faeijch wea, en feleet.

¹⁶ Fuats jinkj dee, dee fief Selwastekje jekreaeje huad, en haundeld doamet, en jewonn fief meeha.

¹⁷ En dee, dee twee jekreaeaje haud, deed jrod soo, en jewonn twee meeha.

¹⁸ Oba dee, dee bloos eent jekraeaje haud, jinkj wajch en growd en Loch enne Ead, en festuak sien Herr sien Selwastkj.

¹⁹ No ne lange Tiet kjeem dee Sklowe aea Herr trig en feraeakjend met siene Sklowe.

²⁰ Dee, dee fief Selwastkje jekraeaje haud brocht fief meeha, en saed: 'Herr, du jeefst mie fief Selwastekje; kjikj! ekj ha fief meeha jewonne.'

²¹ De Herr saed to am: 'Goot! du best en gooda en trua Sklow, du best aewa en poa Dinje tru jewast, ekj woa die aewa fael sate; go enn dien Herr siene Freid enenn.'

²² Donn kjeem dee, dee twee Selwastekje jekraeaje haud, en saed: 'Herr, du jeefst mie twee Selwastekje; kjikj! ekj ha twee meeha jewonne.'

²³ Sien Herr saed to am: 'Goot! du best en gooda en trua Sklow, du best eawa en poa Dinje tru jewast, ekj woa die aewa fael sate. Go enn dien Herr siene Freid enenn.'

²⁴ En dee, dee een Selwastekj jekraeaje haud kjeem uk, en saed: 'Ekj weet daut du en hoada Maun best, du deist arnte wua du nich jeseit hast, en deist toop saumle wua du nich utjestreit hast;

²⁵ en ekj aengst mie, en jinkj wajch en festuak dien Selwastekj enne Ead; kjikj, hia hast waut dient es.'

²⁶ Sien Herr auntwuad en saed to am: 'Du beesa en fula Sklow; du wist daut ekj arnte doo wua ekj nich jeseit ha, en toop saumle doo wua ekj nich utjestreit ha?

²⁷ Du haudst doaromm sullt mien Selwastekj enne Bank jelajcht, dan wan ekj kjeem wudd ekj daut mienje jekjraeaje ha met Entrast.

²⁸ Aulsoo naemt daut Selwastekj fonn am, en jaeft daem daut dee tean haft;

²⁹ dan waeaemma haft, daem woat meeha jejaeft woare, en hee woat aewafluss ha; oba fonn daem dee nich haft, woat sogoa daut wajchjenome woare waut hee haft.

³⁰ En schmiet daem nutsloosa Sklow enn daut butaschte Diestaness enenn; doa woat weegauljet Hiele en Taenekjnirsche senne.'

³¹ En wan dee Menschesaen kome woat enn aul siene Harlichkjeit, en aul siene Enjel met am, dan woat hee opp siene harlichkjeits Troon sette;

³² en aul dee Natsjoone woare fer am toop jesaumelt woare, en hee woat dee utaneen deele, eena fonn dee aundre soo aus en Hoad de Schop fonne Kose,

³³ en hee woat dee Schop to siene rajchte Sied stale, oba dee Kose aune linkje.

³⁴ Dan woat dee Kjeenich to daen aune rajchte Sied saje: 'Komt! dee jie fonn mien Foda jesaeajent sent, oaft daut Rikj daut fa junt reed jemoakt es fonn aunfank de Welt.

³⁵ Dan mie hungad en jie jeewe mie to aete; mie darscht, en jie jeewe mie to drinkje; ekj wea en Framda, en jie neeme mie opp;

³⁶ Ekj wea noaktich, en jie jeewe mie Kjleeda; ekj wea krank, en jie besochte mie; ekj wea em Jefenknes, en jie kjeeme no mie.'

³⁷ Dan woare dee aune rajchte Sied auntwuate en saje: 'Herr, waneehe sag wie die hungrich, en jeewe die aete, oda darschtich, en jeewe die to drinkje?

³⁸ Waneehe sag wie die aus en Framda en neeme die opp, oda noaktich en jeewe die Kjleeda?

³⁹ En waneehe sag wie die krank, oda enn en Jefenknes, en kjeeme no die?'

⁴⁰ En dee Kjeenich woat an auntwuate en saje: 'Enn Woarheit saj ekj junt: Waut jie fa eenem fonn dise jerinjste fonn miene Breeda jedone ha, daut ha jie fa mie jedone.'

⁴¹ Dan woat hee to daen aune linkje Sied saje: 'Got fonn mie wajch, jie Fefluchte! enn daut eewjet Fia daut fa daem Diewel en siene Enjel reed jemoakt es.

⁴² Dan mie hungad, en jie jeewe mie nich to aete; mie darscht, en jie jeewe mie nich to drinkje;

⁴³ Ekj wea en Framda, en jie neeme mie nich opp; noaktich, en jie jeewe mie nich Kjleeda; krank en em Jefenknes, en jie besochte mie nich.'

⁴⁴ Dan woare dee am uk auntwuate en saje: 'Herr, waneehe sag wie die hungrich, oda darschtich, oda en Framda, oda noaktich, oda krank, oda em Jefenknes, en deede die nich bedeene?'

⁴⁵ Dan woat hee an auntwuate en saje: 'Enn Woarheit saj ekj junt: Waut jie nich fa eenem fonn dise jerinjste fonn miene Breeda jedone ha, ha jie uk nich fa mie jedone.'

⁴⁶ En dee woare enn eewje Strof enenn gone, oba dee Jerajchte enn daut eewjet Laewe."