Matay 10

Ne Bibliaj Tik Nawat

ne achtu yaja Shimon ne muilwia Pedro,

wan Andreas ne iikaw,

wan Yakob ikunew Zabday

wan Yojan ne iikaw,

³ Pilipo wan Bar-Tolmay,

Tomas wan Matay ne tumintepewani,

Yakob ikunew Halpay

wan Tadayo,

⁴ Shimon pal Kanan

wan Yuda Ishkaryot, ne temakak.

—Maka shumet tik ujujti ka sejseuk techan, wan maka shikalakikan tik tejtechan pal Shamarea; ⁶ shumet mas yek kan nemit ne ichkamet pulijtiwit ipal Israel. ⁷ Shumet shitanajnawatikan, shinakan ka ne tatekimakalis ipal ne ilwikak nemia nikansan. ⁸ Shikpajtikan ne kukuyat, shikyulkwiltikan ne miktiwit, shikpupukan ne shinpiat, shiktajkalikan ne najnawalmet. Metzintakulijket, ashan shitakulikan anmejemetsan! ⁹ Maka shikanakan teukwit nian tumin nian centavojchichin tik anmucinchoj, ¹⁰ nian anmutanaj tik ne ujti, nian ume anmuwipil, nian anmukak, nian anmutupil, ika yek ma kikwi ne tekitini ne itakwal. ¹¹ Nujme ankalakit tik se techan, shiktajtanikan ká yek wan shinemikan ichan yajane hasta ankisat ka ikuni. ¹² Kwak ankalakit tik ne kal, shiktajpalukan. ¹³ Wan asu yek ne kal, ma wiki ijpak yaja ne anmunejmachnemilis; asu inte yek, ma mukwepa anmujpak ne anmunejmachnemilis. ¹⁴ Wan su ajaka inte metzinkwi yek nian metzinkaki, kwak ankisat tik uni kal wan uni techan shiktzejtzelukan ne tewti tik anmujmukshi, ¹⁵ wan kia nimetzinhilwia: tik ne tunal pal muita ká yek wan ká inte, ne tal pal Sodom wan Gomora yasneki mas yek que yejemet.

¹⁶ Ka né naja nimetzintitania ken majmasat itzalan kujkuyut; yajika, shitamatikan ken ne kuat, melka yujyulyamanik ken ne wilut.

¹⁷ Shiktalikan cuidadoj wan ne takamet, ika tik ne kajkalpuli yawit metzintemakat wan tik ne kajkalsennemit yawit metzinwitekit, ¹⁸ wan yawit walmetzinwikat ishpan tatuktianimet ka numaku pal kiane mumati tay kichijtiwit yejemet wan intejtechan.

¹⁹ Kwak metzintemakat maka shiyulkakasiwikan tay anyawit anhinat, ika tik uni horaj anyawit kimatit tay anhinaskiat, ²⁰ ika inte anmejemet ne taketzat asunte ne Iijiutzin ne Anmuteku ne anmutech taketza.

²¹ Ne se yawi temaka ne iikaw pal kimiktiat, wan ne seuk ne iteku kenhaya; wan tepilawan kintejtenewasket tetekuwan wan kinmiktisket. ²² Wan sujsul yawit metzinhijiat anmejemet ipanpa nutukay. Ká ne kiselia muchi ini hasta ma tami, yawi mupalewia.

²³ Kwak metzintalultiat tik ne se techan, shichulukan ka seuk, ika kia nimetzinhilwia ka achtu ma wiki ne Itelpuch ne Takat inte tamisket ne tejtechan pal Israel.

²⁴ Se mumachtiani inte nemi ijpak ne tamachtiani,

nian se tekitini ijpak ne itekuyu:

²⁵ techajsi ma muchiwa ne mumachtiani ken itamachtiani

wan ne tekitini ken itekuyu.

Asu kinutzket itekuyu ne kal Bal-Zebul, keski mas ne imiakwan!

²⁶ Yajika maka shimajmawikan, ika muchi tay minashtuk yawi muneshtia wan muchi tay mutzaktuk yawi muishmati. ²⁷ Tay ne nimetzinhilwia tik kunyua, shinakan anmejemet tik tawil, wan tay ne antakakit tik anmutakakilis shitejkukan itzunpan ne kajkal ankinajnawatiat. ²⁸ Wan maka shimajmawikan inpanpa ne kimiktiat anmuweyka wan te welit kimiktiat anmualmaj. Mas yek shimajmawikan ipanpa yajane ká weli kiwilewa ne ujume tik miktanshaput, anmualmaj wan anmuweyka.

²⁹ Ankimatit ka munamakat ume gorrion ka se centavojchin; wan se yejemet inte wetzi talchi su ne Anmuteku inte kineki! ³⁰ Hasta mupujtiwit ne tzujtzunkaltzitzin ipal ne anmutzuntekun. ³¹ Yajika maka shimajmawikan: anmejemet mas anmupatiw que miak gorriontzitzin!

³² Yajika, muchi ká ina ishpan takamet ka yaja nupal, naja nusan niaw nina ishpan Nuteku ka ikajku ka yaja nupal; ³³ wan muchi ká ina ishpan takamet ka yaja inte nupal, naja nusan niaw nina ishpan Nuteku ka ikajku ka yaja inte nupal.

³⁴ Maka shikejketzakan ka niwalaj pal nejmachnemi ne tal! Inte niwalaj pal nalwika nejmachnemilis asunte majmachej! ³⁵ Ika niwalaj pal ma mutejtenewakan itzalan se takat wan iteku, itzalan se siwat wan inan, itzalan se siwamunti wan ne inan ishulejyu; ³⁶ wan ne imiakwan se yawit kinekit kijtakuat.

³⁷ Ká ne kitasujta iteku wan ne inan mas que naja inte ipani nupal, wan ká ne kitasujta itelpuch wan isiwakunew mas que naja inte ipani nupal; ³⁸ wan ká ne inte kikwi icruz pal yawi nuipan inte ipani nupal. ³⁹ Ká kiajsiskia ne ialmaj yawi kipulua, wan ká kipuluskia ne ialmaj ka numaku yawi kiajsi!

⁴⁰ Ká ne metzinkwi nechkwi, wan ká ne nechkwi kikwi ne nechtitanij. ⁴¹ Ká ne kikwi se taketzani tik itukay taketzani, ipatiw taketzani yawi ipal; wan ká ne kikwi se yek takat o siwat tik itukay ne yejyek, ipatiw ne yejyek yawi ipal. ⁴² Wan ká ne kimaka chiupi asesek ne mas chikitik pal yejemet tik itukay se mumachtiani, kia nimetzinhilwia ka inte yawi kipulua ipatiw!