Onyankopɔn nyansa ne ne hwɛ

139 Awurade, woahwehwɛ me mu na woahu me. ² Wunim biribiara a meyɛ; wuhu me nsusuwii nyinaa fi akyirikyiri. ³ Sɛ mereyɛ adwuma a, wuhu; sɛ merehome nso a, saa ara. Wunim m’ahokeka nyinaa. ⁴ Ansa na mebue m’ano akasa no, na wunim asɛm a mɛka. ⁵ Woatwa me ho ahyia. Wonam wo tumi so bɔ me ho ban.

⁶ Me ho adwene a wowɔ no du akyiri. Ɛboro m’adwene so. ⁷ Ɛhe na metumi aguan wo mafa? Ɛhe na metumi aguan afi w’anim mafa? ⁸ Sɛ meforo soro a, wowɔ hɔ. Na mekɔsɛw me kɛtɛ asaman a, wo ni! ⁹ Sɛ mefa adekyee ntaban mitu mekɔtena po akyi nohɔ a, ¹⁰ ɛhɔ nso na wo nsa bɛkɔ akogya me na wo nifa beso me mu. ¹¹ Na sɛ mise, esum nko mmɛkata me so na me ho hann nnan sum a, ¹² esum nso nnuru sum mma wo, na anadwo hran sɛ awia; esum ne hann yɛ wo pɛ.

¹³ M’akwaa nyinaa wo na wobɔe; wokekaa me sisii anim wɔ me na yam. ¹⁴ Mekamfo wo efisɛ, ɛsɛ sɛ wosuro wo; nea woyɛ nyinaa yɛ hu na ɛyɛ nwonwa. Minim ne nyinaa wɔ me koma mu. ¹⁵ Bere a wɔreyɛ me nnompe no wɔkeka sisii anim brɛoo wɔ me na yafunu mu. Bere a merenyin dinn wɔ hɔ no, na wunim sɛ mewɔ hɔ; ¹⁶ wuhuu me ansa na wɔrewo me. Nna dodow a woatwa ama me no, ansa na ɛrebefiti ase no, na woakyerɛw wɔ wo nhoma mu dedaw.

¹⁷ O Onyankopɔn, ɛyɛ den sɛ mehu wo nsusuwii; sɛ ne dodow yɛ ahe! ¹⁸ Sɛ mise mɛkan a, ne dodow bɛboro mpoano anhwea. Mesɔre a, meda so ne wo wɔ hɔ.

¹⁹ O Onyankopɔn, me pɛ ne sɛ anka wubekum amumɔyɛfo! Me pɛ ne sɛ basabasayɛfo begyaa me haw! ²⁰ Wɔka amumɔyɛsɛm fa wo ho; wɔka bɔne fa wo din ho. ²¹ O Awurade, mikyi wɔn a wokyi wo na mimmu wɔn a wɔsɔre tia wo no nso. ²² Mikyi wɔn kɔkɔɔkɔ; mefa wɔn sɛ m’atamfo.

²³ Hwehwɛ me mu, O Onyankopɔn, na hu m’adwene; sɔ me hwɛ na hu m’adwene. ²⁴ Na hwɛ sɛ amane kwan bi wɔ me hɔ, na gya me kɔ daa kwan so!