Nnwom 104

Nkwa Asem

Ɔbɔadeɛ ayeyi

104 Me kra, kamfo Awurade! O Awurade, me Nyankopɔn, woyɛ ɔkɛse! Wohyɛ tumi ne anuonyam mu. ² Wode hann akata wo ho. Wotrɛw ɔsoro mu te sɛ ntama, ³ na wusii wo fi wɔ nsu ani. Wode omununkum yɛɛ wo teaseɛnam na wotenaa mu wɔ mframa ntaban so. ⁴ Wode mframa yɛɛ w’asomafo, na anyinam gya a ɛpa no yɛɛ w’asomfo.

⁵ Wode asase asi ne fapem so dennen na ɛrentwe ne ho da. ⁶ Wode ɛpo too so sɛ atade na nsu no kataa mmepɔw so. ⁷ Wokaa nsu no anim no, wɔyerae; wɔtee wo nne nteɛm so no, woguanee. ⁸ Wɔteɛ faa mmepɔw so koguu abon mu kɔɔ baabi a na wɔasiesie ama wɔn. ⁹ Wotoo ɔhye a na wontumi ntra na wɔammɛka asase so nyinaa bio.

¹⁰ Womaa nsuwa teɛ faa abon mu ɛnna nsubɔnten nso faa mmepɔw ntam. ¹¹ Ɛyɛɛ beae a wuram mmoa kɔnom nsu; ɛhɔ na akwaku kokum wɔn sukɔm. ¹² Nnua a ɛbɛn hɔ no so na nnomaa yɛɛ wɔn birebuw too nnwom. ¹³ Wotɔɔ nsu fi soro guu mmepɔw so na wo nhyira buu so wɔ asase so. ¹⁴ Womaa sare nyinii maa anantwi, na afifide nso, wobɔ maa onipa sɛnea ɛbɛyɛ a obetumi adua nnɔbae, ¹⁵ na wayɛ nsa na ne ho atɔ no. Womaa no ngo nso, na wayɛ wɛwɛ ɛne abodoo a ɛbɛma no ahoɔden. ¹⁶ Sida a ɛwɔ Lebanon no nso nya nsu bebree. Awurade no ankasa nnua a oduae. ¹⁷ Ɛso na nnomaa yɛ wɔn birebuw na asukɔnkɔn nso ayɛ wɔn birebuw wɔ ɔpopaw nnua so. ¹⁸ Wuram mmirekyi tena mmepɔw atenten so, na amoakua atena abotan mu.

¹⁹ Wobɔɔ ɔsram sɛ ɔnhyɛ abosom agyirae; owia nim bere a ɔkɔtɔ. ²⁰ Wo na wobɔɔ anadwo na ne sum mu na nkekaboa pue. ²¹ Gyata mma pɔ so bere a wɔreyɛ ha apɛ aduan a Onyankopɔn asiesie ama wɔn. ²² Na sɛ owia pue a, wɔsan kɔhyehyɛ wɔn amoa mu. ²³ Afei nnipa kɔ wɔn nnwuma so kɔyɛ aduwma ara kɔsi anwummere. ²⁴ Awurade, woayɛ nneɛma bebree! Nyansa mu na woyɛɛ ne nyinaa; w’abɔde ahyɛ asase so ma.

²⁵ Ɛpo da hɔ tɛtrɛɛ a abɔde akɛse ne nketewa ahyɛ no ma. ²⁶ Ahyɛn fa so, na bonsu nso goru mu. ²⁷ Wɔn nyinaa dan wo sɛ woma wɔn aduan bebree a wɔhwehwɛ. ²⁸ Wode ma wɔn na wodi. Woma wɔn aduan na wɔn ani sɔ.

²⁹ Wodan w’akyi kyerɛ wɔn a, wɔbɔ hu. Sɛ wugye wɔn home a, wowuwu san kɔ mfutuma a wofi mu bae no mu.

³⁰ Sɛ woma wɔn ahome a, wɔba abɔde mu; woma asase nkwa foforo. ³¹ Awurade anuonyam ntena hɔ daa daa. Awurade ani nnye nea wayɛ no ho! ³² Ɔhwɛ asase na ɛpopo; ɔka mmepɔw na wusiw fi mu ba.

³³ Mete ase yi, mɛto dwom mama Awurade; mewɔ hɔ yi mɛto ayeyi dwom mama me Nynakopɔn. ³⁴ N’ani nnye me dwom no ho efisɛ, m’anigye fi ne nkyɛn. ³⁵ Ma wɔnsɛe nnebɔneyɛfo asase so; ma amumɔyɛfo ase nhyew. Me kra, kamfo Awurade! Munyi Awurade ayɛ!