Nnwom 24

Nkwa Asem

Ɔhene kɛse no

24 Wiase ne nea ɛwɔ mu nyinaa yɛ Awurade de. Asase ne wɔn a wɔte so nyinaa yɛ Awurade de. ² Osii wɔ nsu ase akyirikyiri wɔ asase ase, na ɔtoo ne fapem wɔ ɛpo no ase hɔ.

³ Hena na ɔwɔ tumi sɛ ɔkɔ Awurade bepɔw so? Hena na obetumi akɔ ne fi kronkron no mu? ⁴ Ɛyɛ wɔn a wɔyɛ ade trenee na wodwen adwene pa na wɔnsom anyame na wɔnhyɛ bɔ hunu no. ⁵ Awurade behyira wɔn na wagye wɔn nkwa. Onyankopɔn bebu wɔn bem. ⁶ Saa nnipa no na wɔba Onyankopɔn nkyɛn.Wɔn na wɔba Yakob Nyankopɔn anim.

⁷ Mummue ɔpon no kɛse. Mummue tete apon no na ɔhene kɛse no bɛfa mu. ⁸ Hena ne saa ɔhene kɛse yi? Ɔno ne Awurade, ɔhoɔdenfo ne otumfoɔ no; Awurade, ɔko mu nkonimdifo. ⁹ Mummue ɔpon no kɛse. Mummue tete apon no na ɔhene kɛse no bɛfa mu.

¹⁰ Hena ne saa ɔhene kɛse yi? Nkonimdi Awurade; ɔno ne ɔhene kɛse no!