Сатаната го искушува Исуса

(Мк.1:12-13; Лк.4:1-13) 4 Тогаш Духот го одведе Исуса во пустината, за да биде искушуван од Ѓаволот. ² Откако таму постеше четириесет дни и четириесет ноќи, Тој изгладне. ³ Тогаш искушувачот му пристапи и Му рече: „Ако си Ти Божјиот Син, нареди им на камењава да се претворат во лебови!“ ⁴ Но Исус му одговори: „Светото Писмо вели^[a]:

,Човекот не живее само од леб,

туку и од секој збор што произлегува од Божјата уста!‘“

⁵ Тогаш Ѓаволот Го одведе Исуса во светиот град (Ерусалим), Го постави на врвот на храмот ⁶ и Му рече: „Ако си Ти Божјиот Син, фрли се долу, бидејќи во Светото Писмо пишува^[b]:

,Бог ќе им заповеда на Своите ангели да Те чуваат,

на своите дланки да Те понесат,

за да не ти се препне од камен ногата.‘“

⁷ А Исус му одговори: „Но, го пишува и следново: ,Не искушавај Го Господа, твојот Бог!‘“

⁸ Уште еднаш Ѓаволот Го искачи на највисоката планина и Му ги покажа сите царства на Земјата со сета нивна слава; ⁹ и Му рече: „Сето ова ќе Ти го дадам Тебе, ако паднеш ничкум и ми се поклониш!“ ¹⁰ Но Исус му одговори: „Бегај оттука, Сатано! Светото писмо вели^[c]:

,Поклонувај Му се само на Господ, твојот Бог, и само Нему служи Му!‘“

¹¹ Тогаш Ѓаволот Го остави, а кај Исус дојдоа ангели и Му служеа.

Почеток на Исусовата служба

(Мк.1:14-15; Лк.4:14-15) ¹² Кога Исус разбра дека го уапсиле Јован Крстител, се повлече од Јудеја во Галилеја. ¹³ Тој се исели од Назарет и се насели во Кафарнаум, покрај Галилејското Езеро, на територијата на потомците на Зевулун и Нафтали. ¹⁴ Тогаш се исполни претскажаното од пророкот Исаија, кој рече:

¹⁵ „Во земјата на Зевулун и Нафтали, крај морето, отаде реката Јордан, во Галилеја, каде што живеат луѓе кои не Го познаваат Бога, ¹⁶ народот кој живее во мрак ќе види големо Светило; светлина ќе ги осветли луѓето што живеат во земјата каде што смртта надвиснува со својата сенка.“

¹⁷ Оттогаш Исус започна да проповеда, зборувајќи: „Покајте се, зашто небесното царство се приближува!“

Исус ги избира првите ученици

(Мк.1:14-20; Лк.5:1-11) ¹⁸ Одејќи по брегот на Галилејското Езеро, Исус виде двајца браќа: Симон - подоцна наречен Петар, и неговиот брат Андреј. Тие поставуваа мрежа во езерото, бидејќи по занает беа рибари. ¹⁹ Исус ги повика: „Тргнете по Мене и Јас ќе ве научам како да ловите луѓе!“ ²⁰ Тие веднаш ги оставија своите мрежи и тргнаа по Него.

²¹ Одејќи понатаму, Исус виде и повика уште двајца браќа: Јаков и Јован, синови на Завдај, кои, заедно со својот татко Завдај се наоѓаа во своето бротче и си ги подготвуваа рибарските мрежи. ²² Тие веднаш ги оставија бротчето и татка си и тргнаа по Исус.

Исус поучува, проповеда и исцелува

²³ Исус одеше по цела Галилеја, поучувајќи по синагогите^[d], проповедајќи ја Радосната вест^[e] за Божјото царство и исцелувајќи секакви болести и заболувања кај луѓето. ²⁴ Гласот за Него се рашири дури и во Сирија и кај Него ги доведуваа сите заболени од разни болести, луѓе обземени со демонски духови, епилептичари и парализирани - и Исус ги исцелуваше. 25По Него тргна голема толпа народ од покраините Галилеја и Декаполис, како и од Ерусалим, од Јудеја и од пределите источно од реката Јордан.