ئیشایا 13

Kurdi Sorani Standard

⁴ گوێ بگرن، دەنگی هەراوهۆریا لە چیاکان دێت،
    وەک دەنگی خەڵکی ئێجگار زۆر!
گوێ بگرن، دەنگی هاتوهەرای شانشینەکان دێت،
    وەک دەنگی نەتەوەکان کۆبوونەتەوە!
یەزدانی سوپاسالار
    سوپایان لێ پێکدەهێنێت بۆ جەنگ!
⁵ لە خاکێکی دوورەوە دێن،
    لەوپەڕی ئاسمانەوە دێن،
یەزدان و چەکەکانی تووڕەیی،
    بۆ تێکوپێکدانی سەراپای زەوی.

⁶ واوەیلا بکەن، چونکە ڕۆژی یەزدان^[b] نزیک بووەتەوە،
    وەک وێرانبوون لەلایەن خودای هەرە بە تواناوە دێت.
⁷ لەبەر ئەوە هەموو دەستەکان شل دەبن،
    هەموو دڵێکی مرۆڤ دەتوێتەوە.
⁸ ڕادەچڵەکێن،
    ئازار و ژان دەیانگرێت،
    وەک منداڵبوو دەتلێنەوە.
پیاو واقی وڕدەمێنێت لە هاوڕێکەی،
    ڕوویان وەک ڕووی گڕی ئاگرە.

⁹ ئەوەتا ڕۆژی یەزدان دێت،
    سەختە، توندوتیژ و تووڕەیی بە جۆشە،
بۆ ئەوەی زەوی وێران بکات و
    گوناهبارانی لێ ببڕێتەوە.
¹⁰ چونکە ئەستێرەکانی ئاسمان و کەلووەکانی
    ڕووناکییان دەرناخەن،
خۆر لە کاتی هەڵاتنی تاریک دادێت،
    مانگیش ڕووناکییەکەی نادرەوشێتەوە.
¹¹ سزای جیهان دەدەم لەسەر خراپەکەی،
    بەدکارانیش لەسەر تاوانەکانیان،
کۆتایی دەهێنم بە فیزی لووتبەرزان و
    سەری بێ ویژدانەکان شۆڕ دەکەم.
¹² مرۆڤ لە زێڕی بێگەرد دەگمەنتر دەکەم و
    ئادەمیزادیش لە زێڕی ئۆفیر.
¹³ لەبەر ئەوە ئاسمان دەهەژێنم و
    زەویش لە شوێنی خۆی دەلەرزێت،
لەبەر تووڕەیی یەزدانی سوپاسالار و
    لە ڕۆژی هەڵچوونی تووڕەییەکەی.

¹⁴ وەک مامزی ڕاونراو دەبێت و
    وەک ڕانە مەڕ کەس نەبێت کۆی بکاتەوە،
هەرکەسە ڕوو لە گەلەکەی خۆی دەکات و
    هەرکەسە بەرەو خاکەکەی خۆی هەڵدێت.
¹⁵ ئەوەی بدۆزرێتەوە دەدرێتە بەر خەنجەر و
    ئەوەی بگیرێت بە شمشێر دەکوژرێت.
¹⁶ منداڵەکانیان لەبەرچاویان پارچەپارچە دەکرێن و
    ماڵیان تاڵان دەکرێت و ژنەکانیان زەوت دەکرێن.

¹⁷ ئەوەتا من مادەکان لە دژیان هەڵدەستێنم،
    ئەوانەی گوێ بە زیو نادەن و
    کەیفیان بە زێڕ نایەت.
¹⁸ کەوانەکانیان لاوان تێکدەشکێنن،
    بەزەییان بە کۆرپەکاندا نایەتەوە،
    دڵیان بە منداڵان ناسووتێت.
¹⁹ بابلی شکۆمەندی شانشینەکان و
    جوانی شانازی کلدانییەکان
وەک سەدۆم و عەمۆرا دەبێت،
    کە لەلایەن خوداوە سەرەوژێر کرابێت.
²⁰ هەتاهەتایە ئاوەدان ناکرێتەوە و
    نەوە دوای نەوە کەس تێیدا نیشتەجێ نابێت،
عەرەب لەوێ دەوار هەڵنادات،
    شوانەکان لەوێ مێگەل مۆڵ نادەن.
²¹ بەڵام لەوێ دڕندە بیابانییەکان ڕادەکشێن،
    چەقەڵ خانووەکانی پڕ دەکەن؛
کوندەپەپوو لەوێ نیشتەجێ دەبێت،
    تەگە لەوێ سەما دەکەن.
²² کەمتیار لەناو قەڵاکانی بابل دەلوورێنێت،
    چەقەڵیش لەناو کۆشکەکانی.
کاتەکەی نزیکە بۆ هاتن،
    ڕۆژگاری درێژە ناکێشێت.