ئیشایا 3

Kurdi Sorani Standard

⁴ مێردمنداڵان دەکەم بە میریان،
    منداڵان فەرمانڕواییان دەکەن.

⁵ گەل لەنێو خۆیان ستەم لە یەکتری دەکەن،
    هەرکەسە و لە هاوڕێکەی.
مێردمنداڵ لە پیر ڕاست دەبێتەوە،
    چروکیش لە سەنگین.

⁶ چونکە پیاو یەخەی برای خۆی دەگرێت
    لە ماڵی باوکی و دەڵێت:
«تۆ کەوات هەیە، ببە بە سەرۆکمان و
    ئەم کاولگەیەش لەژێر دەستتە!»
⁷ لەو ڕۆژەدا دەنگ بەرز دەکاتەوە و دەڵێت:
    «نابم بە چارەساز،
نان و بەرگ لە ماڵەکەم نییە.
    مەمکەن بە سەرۆکی گەل.»

⁸ ئۆرشەلیم شکست دەخوات و
    یەهوداش دەکەوێت،
چونکە زمانیان و کردەوەکانیان لە دژی یەزدانە،
    بۆ یاخیبوون لەبەرچاوی شکۆمەندییەکەی.
⁹ دیمەنی ڕوخساریان شایەتییان لەسەر دەدات،
    وەک سەدۆم گوناهەکەیان ڕادەگەیەنن،
    نایشارنەوە.
قوڕبەسەریان،
    چونکە خراپە دەهێننە سەر خۆیان!

¹⁰ بڵێن، ڕاستودروستان خۆشحاڵن
    چونکە بەری کردەوەکانی خۆیان دەخۆن.
¹¹ قوڕبەسەر بەدکار! خراپەی بۆ دەبێت،
    چونکە پاداشتی کردەوەکانی دەستی خۆی وەردەگرێت.

¹² منداڵان ستەم لە گەلی من دەکەن و
    ژنان فەرمانڕەوایەتی دەکەن.
گەلی من، ڕاستەڕێکارانت چەواشەکارن و
    ڕێگای هاتوچۆی تۆیان تێکداوە.

¹³ یەزدان لە شوێنی دادوەر دانیشت،
    هەستا بۆ حوکمدان بەسەر گەلان.
¹⁴ یەزدان دەست بە دادوەری دەکات،
    لەگەڵ پیرانی گەلەکەی و میرەکانیان:
«ئێوە بوون ڕەزەمێوەکەتان لووشدا،
    ڕووتانەوەی هەژاران لە ماڵەکانتانە.
¹⁵ ئەوە چیتانە، گەلەکەم وردوخاش دەکەن و
    ڕووی هەژاران دەهاڕن؟»
            ئەوە فەرمایشتی یەزدانە، پەروەردگاری سوپاسالار.

¹⁶ یەزدان دەفەرموێت:
    «کچانی سییۆن لەخۆبایی بوون،
گەردنیان دەرخستووە و
    بە چاوبازییەوە دەڕۆن،
بە لارولەنجەوە دەڕۆن
    بە زرنگەی لەرزانەی گۆزینگیان.
¹⁷ لەبەر ئەوە پەروەردگار تەپڵی سەری کچانی سییۆن کەچەڵ دەکات،
یەزدان ڕووتی ئەوان بەدەردەخات.»