ئیشایا 33

Kurdi Sorani Standard

² ئەی یەزدان، لەگەڵماندا میهرەبان بە،
    هیوامان بە تۆیە.
هەموو بەیانییەک ببە هێزمان و
    هەروەها ڕزگاریمان لە کاتی تەنگانەدا.
³ لە نەڕەی دەنگت گەلان ڕایانکرد،
    کە ڕاپەڕیت نەتەوەکان پەرت بوون.
⁴ ئەی نەتەوەکان، دەستکەوتەکانتان کۆ دەکرێنەوە وەک چۆن کوللە لە دەغڵ دەدات،
    وەک ڕەوە کوللە خەڵک ڕووتتان دەکەنەوە.

⁵ یەزدان پایەبەرزە، چونکە نیشتەجێی بەرزاییە،
    سییۆن لە ڕاستودروستی و دادپەروەری پڕ دەکات.
⁶ دەوڵەمەندی ڕزگاری، دانایی و زانین
    دەبێتە مایەی دڵنیای کاتەکانت.
    لەخواترسی کلیلی ئەو گەنجینەیە.

⁷ ئەوەتا دلێرەکانیان لە دەرەوە دەقیژێنن،
    نێردراوانی ئاشتی بە تاڵی دەگرین.
⁸ ڕێگاکان چۆڵ بوون،
    بڕانەوە ڕێبواران.
پەیمان شکا و
    شایەتەکانی ڕەتکرانەوە و
    کەس بە هیچ دانانرێت.
⁹ زەوی شیوەن دەکات و سیس بوو،
    لوبنان ڕیسوا بوو، داڕزا،
شارۆن وەک بیابانی عەراڤای^[a] لێهات،
    باشان و کارمەل ڕووتانەوە.

¹⁰ یەزدان دەفەرموێت: «ئێستا هەڵدەستم،
    ئێستا بە گەورە دەزانرێم،
    ئێستا بڵند دەکرێمەوە.
¹¹ بە گیا دووگیان دەبن و
    کاتان دەبێت،
    هەناسەتان ئاگرە و خۆتان دەخوات.
¹² گەلان دەبن بە گەچ،
    وەک چقڵی بڕاوە بە ئاگر دەسووتێنرێن.»

¹³ ئەی دوورەکان گوێتان لێ بێت چیم کردووە،
    ئەی نزیکەکان هێزم بزانن!
¹⁴ گوناهباران لە سییۆن تۆقین،
    گڵاوەکان لەرز دایگرتن:
«کێ لە ئێمە لەناو ئاگری لووشدەر دەمێنێتەوە؟
    کێ لە ئێمە لەناو سووتانی هەمیشەیی دەمێنێتەوە؟»
¹⁵ ئەوەی بە ڕاستودروستی هەڵسوکەوت دەکات و
    ڕاستی دەڵێت،
ئەوەی قازانجی زۆرداری ڕەت دەکاتەوە و
    دەست لە بەرتیل وەرگرتن دەشوات،
ئەوەی لە بیستنی خوێنڕشتن گوێی خۆی کەڕ دەکات و
    لە بینینی خراپە چاوی خۆی دەنوقێنێت،
¹⁶ ئەو لە بەرزایی نیشتەجێ دەبێت،
    قەڵای چیاکان پەناگایەتی،
نانی دەدرێت و
    ئاوی مسۆگەرە.

¹⁷ چاوت پاشا لە جوانی خۆیدا دەبینێت،
    سنوورێکی فراوان دەبینن.
¹⁸ دڵت لە تۆقین ڕادەمێنێت:
    «کوا خامەی نهێنی^[b] و کوا باجگر؟
    کوا بەرپرسی قوللەکان؟»
¹⁹ ئیتر گەلی دڕندە نابینن،
    گەلێک قسەیان ئاڵۆزە بۆ بیستن،
    زمانیان گرانە تێیان ناگەیت.

²⁰ بڕوانە سییۆن شاری جەژنمان،
    چاوەکانت ئۆرشەلیم دەبینن،
    ماڵێکی ئاسوودە، چادرێک ناگوازرێتەوە.
سنگەکانی هەرگیز هەڵناکەنرێن،
    هیچ کام لە گوریسەکانی ناپسێن.
²¹ بێگومان لەوێ یەزدانی توانادار پشتگیرمان دەبێت.
    شوێنی ڕووبارەکان و کەناری جۆگە فراوانەکان دەبێت.
کەشتی سەوڵدار پێیدا ناڕوات و
    کەشتی مەزن پێیدا تێناپەڕێت.
²² چونکە یەزدان دادوەرمانە،
    یەزدان فەرزدانەرمانە،
یەزدان پاشامانە،
    ئەو ڕزگارمان دەکات.

²³ گوریسەکانت شل بوون،
    بنکەی دار ئاڵای کەشتییەکەیان توند ناکەن،
    چارۆکە بڵاو ناکەنەوە.
ئینجا دەستکەوتی زۆر دابەش کرا،
    شەلەکانیش تاڵانییان تاڵان کرد.
²⁴ دانیشتووی سییۆن ناڵێت، «نەخۆش کەوتم،»
ئەو گەلەی تێیدا نیشتەجێیە تاوانەکانی بەخشراو دەبێت.