ئیشایا 46

Kurdi Sorani Standard

³ «ئەی بنەماڵەی یاقوب، گوێم لێ بگرن،
    ئەی هەموو پاشماوەی بنەماڵەی ئیسرائیل،
ئەی ئەوانەی هەڵمگرتوون لەو کاتەوەی لەناو ڕەحم بوونە،
    لەو ڕۆژەوەی کە لەدایک بوونە گرنگیم پێداون.
⁴ هەتا پیریش بن هەر من ئەوم،
    هەتا ڕیش سپیێتیش هەر من هەڵتاندەگرم.
من دروستم کردوون و ئێوە باری منن،
    هەر من هەڵدەگرم و دەرباز دەکەم.

⁵ «بە کێ هاوشێوەم دەکەن و یەکسانم دەکەن و
    هاووێنەم دەکەن بۆ ئەوەی لە یەک بچین؟
⁶ ئەوانە زێڕ لە کیسەوە بەتاڵ دەکەن و
    زیویش بە تەرازوو دەکێشن،
زێڕنگەرێک بەکرێ دەگرن و دەیکاتە خوداوەندێک،
    ڕوو لە زەوی دەکەن بۆی و کڕنۆشی بۆ دەبەن.
⁷ دەیخەنە سەر شان، هەڵیدەگرن،
    لە جێی خۆی دایدەنێن بۆ ئەوەی ڕاوەستێت،
    لە جێی خۆی ناجوڵێتەوە.
هاواری بۆ دەکات و وەڵام ناداتەوە،
    لە تەنگانەکەی ڕزگاری ناکات.

⁸ «ئەمەتان لەبیر بێت و وردبنەوە!
    ئەی یاخیبووان، بیخەنە مێشکتانەوە.
⁹ سەرەتاکانتان لەبیر بێت کە لە کۆنەوەیە،
    بە ڕاستی من خودام و یەکێکی دیکە نییە،
    خودام و هیچی دیکە نییە وەک من.
¹⁰ لە سەرەتاوە کۆتاییم ڕاگەیاندووە،
    لە کۆنەوەش ئەوەی هێشتا نەکراوە.
فەرمووم: ”ڕاوێژی من سەر دەگرێت،
    هەموو ئەوەی پێم خۆشە دەیکەم.“
¹¹ داڵ لە ڕۆژهەڵاتەوە بانگ دەکەم،
    لە خاکێکی دووریشەوە ئەوەی ئامانجی من بەجێدەگەیەنێت.
فەرمووم و ئەنجامی دەدەم،
    دامڕشتووە و دەیکەم.
¹² ئەی کەللەڕەقەکان، گوێم لێ بگرن،
    ئەی دوورەکان لە ڕاستودروستی.
¹³ ڕاستودروستی خۆمم نزیک خستووەتەوە،
    دوور ناکەوێتەوە و
    ڕزگاربوونم دوا ناکەوێت.
ڕزگاری بە سییۆن دەبەخشم،
    بە ئیسرائیلی شکۆمەندیم.