Masalimo 113

Mawu a Mulungu mu Chichewa Chalero

Mutamandeni, inu atumiki a Yehova,
    tamandani dzina la Yehova.
² Yehova atamandidwe,
    kuyambira tsopano mpaka muyaya.
³ Kuyambira ku matulukiro a dzuwa mpaka ku malowero ake,
    dzina la Yehova liyenera kutamandidwa.

⁴ Yehova wakwezeka pa anthu a mitundu yonse,
    ulemerero wake ndi woposa mayiko akumwamba.
⁵ Ndani wofanana ndi Yehova Mulungu wathu,
    Iye amene amakhala mwaufumu mmwamba?
⁶ amene amawerama pansi kuyangʼana
    miyamba ndi dziko lapansi?

⁷ Iye amakweza munthu wosauka kuchoka pa fumbi
    ndi kutukula munthu wosowa kuchoka pa dzala;
⁸ amawakhazika pamodzi ndi mafumu,
    pamodzi ndi mafumu a anthu ake.
⁹ Amakhazikitsa mayi wosabereka mʼnyumba yake
    monga mayi wa ana wosangalala.

Tamandani Yehova.